பல இன்னல்களுக்கு தொடர்ந்தும் முகங்கொடுத்துவரும் தமிழ் அரசியல் கைதிகளுக்கு பொதுமன்னிப்பு வழங்கப்பட வேண்டும் என, மன்னார் பிரஜைகள் குழுவின் தலைவர் அருட்தந்தை எஸ்.ஞானப்பிரகாசம் அடிகளார் வேண்டுகோள் விடுத்துள்ளார்.

அநுராதபுரம் சிறையில் உண்ணாவிரதப் போராட்டத்தில் ஈடுபட்டுள்ள கைதிகளை மன்னார் பிரஜைகள் குழுவினர் நேற்று சந்தித்து கலந்துரையாடியிருந்தனர்.

இந்நிலையில், இன்று (வியாழக்கிழமை) மன்னார் பிரஜைகள் குழுவில் ஊடகவியலாளர்களை சந்தித்த அருட்தந்தை இதனை தெரிவித்துள்ளார்.

அங்கு தொடர்ந்து தெரிவித்த அருட்தந்தை, ”தமது விடுதலைக்கு முன் நின்று உழைக்குமாறு அரசியல் கைதிகள் எங்களிடத்தில் கோரிக்கை விடுத்தனர்.

தாங்கள் எவ்வித விசாரணைகளும் இன்றி தொடர்ந்தும் தடுத்து வைக்கப்பட்டுள்ளதாகவும் இதுவரை காலமும் தமக்கு எவ்வித விமோசனமும் கிடைக்கவில்லை என அவர்கள் கவலை தெரிவித்தனர்.

சுகயீனம் அடைந்துள்ள போதும் கைவிலங்கிடப்பட்டே வைத்திய சிகிச்சை வழங்கப்படுவது குறித்தும் அவர்கள் கவலை வெளியிட்டனர்.

தங்களை விடுதலை செய்யாது விட்டாலும், தங்களை புனர்வாழ்வுக்கு அனுப்பும்படி கோரிக்கை விடுத்துள்ளனர்.

இந்நிலையில், அரசியல் கைதிகளின் விடுதலைக்காக அனைவரும் இணைந்து குரல் கொடுக்க வேண்டும். குறிப்பாக அரசியல் பிரமுகர்களை அணுகி அரசியல் கைதிகளின் விடுதலைக்காக இந்நாட்டின் ஜனாதிபதியிடம் கோரிக்கை முன்வைக்க நாங்கள் தீர்மானித்துள்ளோம்.

இவர்கள் அனைவருக்கும் பொதுமன்னிப்பு வழங்கி புனர்வாழ்வு வழங்க வேண்டும் என அரசினையும் அதனை சார்ந்துள்ளோரிடமும் நாங்கள் கேட்டுக் கொள்கின்றோம்” எனக் குறிப்பிட்டார்.

மேலும் செய்திகளை உடனுக்குடன் படிக்க, ஆதவன் Android Mobile App இனை, ஆதவன் IOS Mobile App இனை இங்கே கிளிக் செய்து தரவிறக்கம் செய்துகொள்ளுங்கள்.