அவுஸ்ரேலியா மற்றும் நியூசிலாந்து தொடர்களில் இருந்து அதிக அளவில் கற்றுக் கொண்டேன் என இந்தியக் கிரிக்கெட் அணியின் வேகப்பந்து வீச்சு சகலதுறை வீரரான விஜய் சங்கர் தெரிவித்துள்ளார்.

மெல்பேர்னில் நடைபெற்ற அவுஸ்ரேலியா அணிக்கெதிரான ஒருநாள் போட்டியில் அறிமுகமான விஜய் சங்கர், அதனைத் தொடர்ந்து நடைபெற்ற நியூசிலாந்து அணிக்கெதிரான ரி-20 தொடரில் களமிறக்கப்பட்டார்.

இந்நிலையில் இந்த இரு தொடர்களிலும் விளையாடியது குறித்து அவர் கூறுகையில், ”அணி நிர்வாகம் என்னை மூன்றாவது இடத்தில் களம் இறங்கி துடுப்பெடுத்தாடுங்கள் என்று கூறியது மிகப்பெரிய வியப்பாக இருந்தது. சூழ்நிலையை புரிந்து கொண்டு அதற்கு தகுந்தபடி விளையாடுவதில் கவனம் செலுத்தினேன். இந்தியா போன்ற அணிக்காக விளையாடும்போது, எல்லா விதங்களிலும் விளையாட தயாராக இருக்க வேண்டும்.

அவுஸ்ரேலியா மற்றும் நியூசிலாந்து தொடர் முழுவதில் இருந்து அதிக அளவில் கற்றுக் கொண்டேன். நான் அதிக அளவில் பந்து வீசவில்லை. ஆனால், வித்தியாசமான சூழ்நிலைகளில் பந்து வீச கற்றுக் கொண்டேன். விராட் கோஹ்லி, ரோஹித் சர்மா, டோனி எப்படி துடுப்பெடுத்தாடுகிறார்கள் என்பதை பார்த்தேன். அதில் இருந்து பலவற்றை கற்றுக் கொண்டேன்.

என்னைப் பொறுத்தவரையில் கடைசி போட்டி கூட கற்றுக் கொள்வதற்கான அனுபவம்தான். இன்னொரு பவுண்டரியை விட ஒன்று அல்லது இரண்டு ஓட்டங்களுக்கு முயற்சி செய்திருக்க வேண்டும். நான் எப்போதும் இந்திய அணிக்கு வெற்றியை தேடிக்கொடுக்க வேண்டும் என்றுதான் விரும்புவேன். அணிக்காக என்னால் வெற்றியை தேடிக்கொடுக்க முடியும் என்றால், தானாகவே அது என்னுடைய தனிப்பட்ட விளையாட்டை வளர்க்கும்.

என்னைப் பொறுத்தவரைக்கும், முக்கியமான விடயம், வித்தியாசமான சூழ்நிலைக்கு ஏற்ப விரைவாக மாறி தொடர்ச்சியாக சிறப்பாக விளையாட வேண்டும் என்பதுதான்” என கூறினார்.

நியூசிலாந்து அணிக்கெதிரான ரி-20 தொடரில் மூன்றாவது வீரராக களமிறக்கப்பட்ட விஜய் சங்கர், முதல் போட்டியில் 23 ஓட்டங்களும், இறுதி ரி-20 போட்டியில் 28 பந்தில் 43 ஓட்டங்களும் அடித்து அசத்தினார்.

இந்தியா அணி நெருக்கடியான நேரத்தில் இருந்த போது, பொறுப்பான துடுப்பாட்டத்தை வெளிப்படுத்தியதால், அவரை எதிர்வரும் உலகக்கிண்ண தொடரில் சேர்த்துக் கொள்ள வேண்டுமென தற்போது பல முன்னாள் வீரர்கள் கோரிக்கை விடுத்து வருகின்றனர்.

விஜய் ஷங்கர் மற்றும் ஹர்திக் பண்ட்யா ஆகிய இருவரில், ஒருவருக்கு தான் உலகக்கிண்ண தொடருக்கான இந்திய அணியில், வாய்ப்பு கிடைக்கும் என்று எதிர்பார்க்கப்படுகின்றது.

எனினும், அவர் இன்னமும் அனுபவமில்லாத வீரராகவும் அரை சதம், சதம், விக்கெட்டுகள் என எந்தவிதமான திறனையும் எட்டாததால், அவர் உலகக்கிண்ண அணியில் இடம்பெறுவது கடினம் என கூறப்படுகின்றது.

மேலும் செய்திகளை உடனுக்குடன் படிக்க, ஆதவன் Android Mobile App இனை, ஆதவன் IOS Mobile App இனை இங்கே கிளிக் செய்து தரவிறக்கம் செய்துகொள்ளுங்கள்.