ஐரோப்பாவிலிருக்கும் உயர்தர கால்பந்து கழகங்களுக்காக நடத்தப்படும் சம்பியன்ஸ் லீக் கால்பந்து தொடர், தற்போது விறுவிறுப்புக்கு பஞ்சமில்லாமல் நடைபெற்று வருகின்றது.

இதில் 11 முறை சம்பியன் அணியான ரியல் மெட்ரிட் அணி, ஐந்து முறை சம்பியனான பார்சிலோனா அணி, அட்லெடிகோ மெட்ரிட் அணி, ஜூவெண்டஸ், மென்செஸ்டர் யுனைடெட், பரிஸ் செயிண்ட் ஜேர்மைன், லிவர்பூல் என 32 முன்னணி அணிகள் இத்தொடரில் பங்கேற்று விளையாடி வருகின்றன.

இதில் எட்டு குழுக்கள் பிரிக்கப்பட்டு அதில் நான்கு அணிகள் உள்ளடக்கப்பட்டுள்ளன. இதற்கமைய போட்டிகள் நடத்தப்பட்டு வருகின்றன.

இந்நிலையில் நேற்று ரெட் ஸ்டார் விளையாட்டரங்கில் நடைபெற்ற போட்டியில், ரெட் ஸ்டார் பெல்கிரேட் அணுpம், லிவர்பூல் அணியும் பலப்பரீட்சை நடத்தின.

இரசிகர்களின் உச்சக் கட்ட பரபரப்புக்கு மத்தியில் நடைபெற்ற இப்போட்டியில், பலம் பொருந்திய வீரர்களை கொண்ட லிவர்பூல் அணி, ரெட் ஸ்டார் பெல்கிரேட் அணியிடம் 0-2 என்ற கோல்கள் கணக்கில் தோல்வியடைந்தது.

இப்போட்டியில் லிவர்பூல் அணி எளிதாக வெற்றியை பதிவு செய்யும் என பலராலும் எதிர்பார்க்கப்பட்டது. ஆனால் அந்த எதிர்பார்ப்புக்களை ரெட் ஸ்டார் பெல்கிரேட் அணி தவிடுபொடியாக்கியது.

ஆரம்பம் முதலே லிவர்பூல் அணிக்கு ரெட் ஸ்டார் பெல்கிரேட் அணி கடும் சவால் அளித்தது. இதற்கமைய போட்டியின் 22ஆவது நிமிடத்தில் ரெட் ஸ்டார் பெல்கிரேட் அணியின் நட்சத்திர வீரரான மிலான் பாவ்கோவ் அணிக்காக முதல் கோலை பெற்றுக் கொடுத்து, அரங்கில் குழுமியிருந்த இரசிகர்களை இன்ப வெள்ளத்தில் ஆழ்த்தினார்.

இதன்பிறகு லிவர்பூல் அணி, பதில் கோல் போட கடுமையாக முயற்சித்த போதும் அது பலனளிக்கவில்லை.

ஆனால் மறுபுறத்தில் சளைக்காமல் ஆக்ரோஷமாக விளையாடிய ரெட் ஸ்டார் பெல்கிரேட் அணி, 29 நிமிடத்தில் மைலான் பாவ்கோவ்வின் துணையுடன் இரண்டாவது கோலை புகுத்தியது.

இதனால் ரெட் ஸ்டார் பெல்கிரேட் அணி, 2-0 என்ற கணக்கில், முற்பாதியில் முன்னிலைப் பெற்றது.

இதனைதொடர்ந்து நடைபெற்ற இரண்டாவது பாதியில், இரு அணி வீரர்களும் இரு மடங்கு ஆக்ரோஷத்துடன் விளையாடினர். எனினும் கோல் போடும் வாய்ப்பு எந்த அணிக்கு பலனளிக்கவில்லை.

இதனால் போட்டியின் இறுதியில் ரெட் ஸ்டார் பெல்கிரேட் அணி, 2-0 என்ற கணக்கில் வெற்றிபெற்று, லிவர்பூல் அணிக்கு அதிர்ச்சி அளித்தது.

குழு ‘சி’ யில் இடம்பெற்றுள்ள லிவர்பூல் அணி, நான்கு போட்டிகளில் விளையாடி இரண்டு வெற்றி, இரண்டு தோல்வி என ஆறு புள்ளிகளுடன் இரண்டாவது இடத்தில் உள்ளது.

ரெட் ஸ்டார் பெல்கிரேட் அணி, நான்கு போட்டிகளில் விளையாடி ஒன்றில் வெற்றி, ஒன்றில் தோல்வி, இரண்டில் சமநிலை என 4 புள்ளிகளுடன் நான்காவது அதாவது இறுதி இடத்தில் உள்ளது.

மேலும் செய்திகளை உடனுக்குடன் படிக்க, ஆதவன் Android Mobile App இனை, ஆதவன் IOS Mobile App இனை இங்கே கிளிக் செய்து தரவிறக்கம் செய்துகொள்ளுங்கள்.