தமிழ் அரசியல் கைதிகளை விடுவிக்க வலியுறுத்தும் கருணை மனுவிற்கு ஆதரவுகோரி சர்வ மதத் தலைவர்களுடன் சந்திப்பு இடம்பெற்றுள்ளது.

யாழ். மாவட்டத்திலுள்ள சர்வ மதத் தலைவர்களுடன் அரசியல் கைதிகளின் உறவுகள் இன்று (வியாழக்கிழமை) சந்தித்துக் கலந்துரையாடியுள்ளனர்.

ஒன்றுபட்டு தமிழ் அரசியல் கைதிகளை சிறைமீட்க வலியுறுத்தி அரசியல் கட்சித் தலைவர்களையும் ஆன்மீகத் தரப்பினரையும் தமிழ் அரசியல் கைதிகளின் உறவுகள் கடந்த நாட்களில் தொடர்ச்சியாக நேரில் சந்தித்து வலியுறுத்தி வருகின்றனர்.

தமிழ் அரசியல் கைதிகளை கருணை அடிப்படையில் விடுவிக்க கோரி கைதிகளின் உறவுகள் சார்பில், இலங்கை அரச தரப்பிற்கு கருணை மனுவொன்றை கையளிக்க ஏற்பாடு செய்யப்பட்டு வருகின்றது.

இந்நிலையில், தமிழ் அரசியல் கைதிகளை விடுவிக்கும் செயற்பாட்டில் ஈடுபட்டு வரும் குரலற்றவர்களின் குரல் அமைப்பின் ஏற்பாட்டில் இந்தச் சந்திப்பு இடம்பெற்றுள்ளது.

குறித்த கருணை மனுவில் கையொப்பமிட்டு ஆதரவினை வழங்கி தமிழ் அரசியல் கைதிகளின் விடுதலைக்கு வலுச்சேர்க்குமாறு கோரி யாழ் மாவட்டத்திலுள்ள சர்வ மதத் தலைவர்களுடன் அரசியல் கைதிகளின் உறவுகள் இன்று சந்தித்து கலந்துரையாடியுள்ளனர்.

இதன்படி, யாழ். நாக விகாரை விகாராதிபதி விமல தேரர், அகில இலங்கை ஜம்மியத்துல் உலமா சபையின் யாழ்ப்பாணம்-கிளிநொச்சி மாவட்ட தலைவர் மௌலவி என்.எம்.இர்பான், செயலாளர் மௌலவி ஏ.எம்.றலீம் உள்ளிட்டவர்களுடன் சந்திப்பு இடம்பெற்றுள்ளது.

அதேபோன்று, மானிப்பாய் யாத்திர ஸ்தல பங்குத்தந்தை ரெக்ஸ்சவுந்திராவையும் நேரில் சந்தித்து கலந்துரையாடியுள்ளனர்.

மேலும் செய்திகளை உடனுக்குடன் படிக்க, ஆதவன் Android Mobile App இனை, ஆதவன் IOS Mobile App இனை இங்கே கிளிக் செய்து தரவிறக்கம் செய்துகொள்ளுங்கள்.