மலையகத்தில் வாழும் பெருந்தோட்ட மக்களுடைய உரிமைகள் தொடர்பான கோரிக்கைகளை முன்வைத்து நுவரெலியா- அக்கரப்பத்தனை, வேவர்லி பகுதியில் சத்தியாக்கிரக போராட்டமொன்று முன்னெடுக்கப்பட்டது

வேவர்லி விளையாட்டு மைதானத்தில் இன்று (சனிக்கிழமை) காலை இப்போராட்டம் முன்னெடுக்கப்பட்டது.

இதனை லங்கம் கம்பனியின் கீழ் இயங்கும் வேவர்லி தோட்டத்தின் முன்னாள் தொழிற்சங்க தோட்ட நிர்வாகி ஒருவர் ஏற்பாடு செய்திருந்தார்.

இந்த போராட்டத்தில் 30 க்கும் மேற்பட்டவர்கள் கலந்துகொண்டு பெருந்தோட்ட மக்களுடைய உரிமைகளுக்காக குரல் கொடுத்தனர்.

இதன்போது போராட்டத்தில் கலந்துகொண்டவர்கள் தெரிவித்துள்ளதாவது,

“தோட்டங்களில் தொழில்புரியும் தொழிலாளர்களுக்கு தனி வீடுகள் அமைத்துக் கொடுக்கப்பட்டு, லயன் குடியிருப்பு முற்றாக ஒழிக்கப்பட வேண்டும்.

தொழிலாளர்களுடைய வாழ்க்கை வருமானத்தை உயர்த்தும் வகையில் நாளாந்த சம்பளத்தை இன்றைய கால சூழ்நிலைக்கு ஏற்புடைய வகையில் அதிகரிக்க வேண்டும்.

மேலும் அரசாங்கத்தால் 1994 ஆம் ஆண்டு அறிமுகம் செய்யப்பட்ட சமுர்த்தி அபிவிருத்தி திட்டத்தின் உதவி தொகைகளில் விடுபட்ட தோட்ட தொழிலாளர்களின் வறுமையானவர்களை இனங்கண்டு உள்வாங்குதல் மற்றும் தோட்ட நிர்வாகங்கள் தேயிலைகளை பராமரிப்பதற்கு தவறி வரும் நிலைமையை மாற்றியமைத்து செயற்படுவதற்கு ஜனாதிபதி மைத்திரிபால சிறிசேன நடவடிக்கை மேற்கொள்ள வேண்டும்” என கோரிக்கை விடுத்துள்ளனர்.

மேலும் செய்திகளை உடனுக்குடன் படிக்க, ஆதவன் Android Mobile App இனை, ஆதவன் IOS Mobile App இனை இங்கே கிளிக் செய்து தரவிறக்கம் செய்துகொள்ளுங்கள்.