மட்டக்களப்பு மாநகரசபையில் பொதுமக்களின் தேவை கருதியே செலவுகளை மேற்கொள்ள வேண்டும் எனவும், அநாவசியமான ஆடம்பர செலவுகளுக்கு மக்களின் பணங்களை வீண்விரயம் செய்வதை ஏற்க முடியாது எனவும் தமிழ் மக்கள் விடுதலைப் புலிகள் கட்சியின் மட்டக்களப்பு மாநகர சபை உறுப்பினர் கே. காந்தராஜா தெரிவித்துள்ளார்.

மட்டக்களப்பு மாநகர சபைக்கு சொகுசு வாகனம் ஒன்று கொள்வனவு செய்யப்படவுள்ளமை தொடர்பில் இன்று(ஞாயிற்றுக்கிழமை) ஊடகங்களுக்கு கருத்து வெளியிடும் போதே அவர் இவ்வாறு தெரிவித்துள்ளார்.

இதுதொடர்பில் கருத்து வெளியிட்ட அவர், “மட்டக்களப்பு மாநகர சபையின் 9வது அமர்வு கடந்த 06ஆம் திகதி நடைபெற்ற போது மாநகர முதல்வரினால் சொகுசு வாகனமொன்றைக் கொள்வனவு செய்வது தொடர்பாக கொண்டுவரப்பட்ட தீர்மானத்தினை ஏற்றுக்கொள்ள முடியாது.

மட்டக்களப்பு மாநகர உட்பட எந்தவொரு உள்ளுராட்சி மன்றங்களும் பொதுமக்களின் வரிப்பணத்திலேயே இயங்குகின்றன. அவ்வாறிருக்கும்போது பொதுமக்களின் வரிப்பணத்தை அநாவசியச் செலவுகள் செய்வதற்கு அனுமதிக்க முடியாது.

பொதுமக்களின் வரிப்பணத்தைக் கொண்டு சொகுசு வாகனம் வாங்கி அதில் பயணம் செய்து சொகுசு அனுபவிப்பதை விட பொதுமக்களின் அந்த வரிப் பணத்தைக் கொண்டு மீளவும் பொதுமக்களின் தேவைகளையே பூர்த்தி செய்தால் சிறப்பாக இருக்கும்.

அதுதான் சரியானதும் கூட. பொதுமக்களுக்கு நிறைவேற்றிக் கொடுக்க வேண்டிய பல அத்தியாவசிய சேவைகள் கிடப்பில் இருக்கும்போது இவ்வாறு சிந்திப்பது அநியாயமானது.

உதாரணமாக மட்டக்களப்பு மாநகர சபையில் கழிவகற்ற தேவையான போதியளவு வாகனங்கள் இல்லாத நிலை காணப்படுகின்றது. இதனால் பல கிராமங்களில் குறித்த நாட்களுக்குள் குப்பைகளையும், கழிவுகளையும் அகற்ற முடியாமல் உள்ளதால் மக்கள் பல அசௌகரியங்களை எதிர்நோக்கி வருகின்றனர்.

எனவே சொகுசு வாகனம் வாங்குவதற்காக சுமார் எட்டு மில்லியன் ரூபா அளவில் பணம் செவவு செய்து வாங்க வேண்டிய அவசியம் இல்லை.

எமது மாநகர சபையின் முதல்வர், மற்றும் ஆணையாளர்கள் பயணம் செய்வதற்கு என இரண்டு வாகனங்கள் உள்ளபோது இன்னுமொரு வாகனம் வாங்கவேண்டிய அவசியம் இல்லவே இல்லை.

பொதுமக்களின் வரிப்பணத்தில் கழிவகற்றலுக்காக பயன்படுத்தக்கூடிய நவீனரக வாகனங்களை கொள்வனவு செய்வதன் மூலம் மட்டக்களப்பு மாநகர மக்களின் பல தேவைகளை இலகுவாக பூர்த்திசெய்ய முடியும்“ என தெரிவித்துள்ளார்.

மேலும் செய்திகளை உடனுக்குடன் படிக்க, ஆதவன் Android Mobile App இனை, ஆதவன் IOS Mobile App இனை இங்கே கிளிக் செய்து தரவிறக்கம் செய்துகொள்ளுங்கள்.