அடுத்த ஜனாதிபதி வேட்பாளர்கள் தொடர்பான கருத்துகள் அதிகரித்துள்ள நிலையில் ராஜபக்ஷர்கள் தவிர்ந்த வேறு ஒரு ஜனாதிபதி வேட்பாளராக முன்னிலைப்படுத்த ஒன்றிணைந்த கூட்டு எதிரணியின் ஒரு தரப்பினர் முயன்று வருவதாக தெரிவிக்கப்படுகின்றது.

பல்வேறு விமர்சனங்களுக்கு உள்ளாகியுள்ள அடுத்த ஜனாதிபதி தேர்தல் தொடர்பாக கொழும்பு ஊடகம் ஒன்று வெளியிட்டுள்ள செய்தி ஒன்றிலேயே இந்த விடயம் குறிப்பிடப்பட்டுள்ளது.

அதன்படி முன்னாள் அமைச்சராக பதவிவகித்த பிரபல்யமான பெண் ஒருவரை ஜனாதிபதி வேட்பாளராக களமிறக்க ஒன்றிணைந்த கூட்டு எதிரணியின் சிலர் ஆலோசனைகளை மேற்கொண்டு வருவதாக குறிப்பிடப்படுகின்றது.

இதன்காரணமாக கூட்டு எதிரணித் தரப்பினரிடையே கருத்து வேறுபாடுகள் காணப்பட்டு வருதாக தெரிவிக்கப்படுவதோடு, இந்த விடயம் தொடர்பாக ஆலோசனைகள் இடம்பெற்று வருவதாகவும் குறித்த செய்தியில் மேலும் தெரிவிக்கப்பட்டுள்ளது.

அதேபோன்று முன்னாள் ஜனாதிபதி மஹிந்த ராஜபக்ஷவை அடுத்த பிரதமராக பதவியில் அமர்த்துவதற்கும் ஒன்றிணைந்த கூட்டு எதிரணி தீவிர முயற்சிகளை மேற்கொண்டு வருவதாகவும் தெரிவிக்கப்படுகின்றமை குறிப்பிடத்தக்கது.

இதேவேளை, முன்னாள் பாதுகாப்பு செயலாளர் கோட்டாபய ராஜபக்ஷ அடுத்த ஜனாதிபதித் தேர்தலில் வேட்பாளராக களமிறங்குவார் எனச் செய்திகள் வெளிவந்திருந்தமை சுட்டிக்காட்டப்படத்தக்கது.

இந்த நிலையில் மஹிந்தவிற்கு ஆதரவு அளித்துவரும் ஒன்றிணைந்த கூட்டு எதிரணித் தரப்பிலேயே அதற்கு மாறான செயற்திட்டங்களை முன்னெடுத்து வருவதால் மஹிந்த ஆதரவாளர்களுக்கிடையே கருத்து வேறுபாடுகள் காணப்படுகின்றதா? என்ற சந்தேகமும் ஏற்படுகின்றது.

அதேபோன்று மறுமுனையில், பிரதமர் ரணில் விக்ரமசிங்க, ஜனாதிபதி மைத்தரிபால சிறிசேன மற்றும் சஜித் பிரேமதாச, சரத் பொன்சேகா ஆகியோரும் ஜனாதிபதித் தேர்தலில் போட்டியிடவுள்ளதாக ஏற்கனவே செய்திகள் வெளியாகியிருந்தன.

இந்த நிலையில் ஒன்றிணைந்த கூட்டு எதிரணியின் இந்த புதிய ஆலோசனைகள் மஹிந்த ஆதரவாளர்களுக்கு இடையிலேயே சர்ச்சைகளை ஏற்படுத்தியுள்ளதா என்ற சந்தேகத்தை வலுவடையச் செய்துள்ளமையும் குறிப்பிடத்தக்கதாகும்.

மேலும் செய்திகளை உடனுக்குடன் படிக்க, ஆதவன் Android Mobile App இனை, ஆதவன் IOS Mobile App இனை இங்கே கிளிக் செய்து தரவிறக்கம் செய்துகொள்ளுங்கள்.