2018ஆம் ஆண்டுக்கான யு.இ.எப்.ஏ.வின் தலைவருக்கான விருது இங்கிலாந்து கால்பந்து அணியின் முன்னாள் நட்சத்திர வீரரான டேவிட் பெக்காமிற்கு வழங்கப்படவுள்ளது.

யு.இ.எப்.ஏ.வின் தலைவருக்கான விருதானது சிறந்த சாதனைகள், தொழில்முறை சிறப்பம்சம் மற்றும் முன்மாதிரியான தனிப்பட்ட குணங்களை அங்கீகரித்து வழங்கப்படும் உயரிய விருதாகும்.

இதற்கமைய, மகத்தான வாழ்க்கை மற்றும் மனிதாபிமான முயற்சிகளை சிறப்பாக மேற்கொண்டதன் அடிப்படையில் இந்த விருது இங்கிலாந்து கால்பந்து அணியின் முன்னாள் தலைவரும் மத்தியக் கள வீரருமான டேவிட் பெக்காம்மிற்கு வழங்கப்படவுள்ளது.

இந்த அறிவிப்பினை யு.இ.எப்.ஏ. சங்கம் அறிவித்துள்ளது. இதற்கமைய இந்த விருது வருட இறுதியில் மொனோக்கோவில் வைத்து பெக்காமிற்கு வழக்கப்படும்.

இதுவிருது கிடைக்கப் பெறுவது குறித்து மகிழ்ச்சியின் உச்சத்தில் உள்ள டேவிட் பெக்காம் கூறிய கருத்துக்கள் இவை, “எனது வாழ்க்கையில் நூறுவிதமான முயற்சிகளை நான் மேற்கொண்டிருக்கின்றேன். அணியின் மதிப்பை தக்க வைத்துக்கொள்வதற்காக, முன்னதாக இந்த விருதை வென்ற வீரர்களின் பட்டியலில் நானும் இடம்பெறுவதை எண்ணி பெருமைப்படுகிறேன்” என கூறினார்.

டேவிட் பெக்காம், தலைமுறைக்கான சிறந்த கால்பந்து அடையாளம் என யு.இ.எப்.ஏ.வின் தலைவர் அலெக்ஸாண்டர் செஃபெரின் புகழாரம் சூட்டியுள்ளார்.

மான்செஸ்டர் யுனைடெட் மற்றும் ரியல் மெட்ரிட் கழக அணிகளின் சிறந்த மத்திய கள வீரர் என்ற விருது, சிறந்த கால்பந்து வீரர் விருது என பல விருதுகளை பெற்றுக்கொண்ட பிறகு, இந்த விருதை பெக்காம் பெறுகிறார்.

டேவிட் பெக்காம், யுனிசெப் மற்றும் மலேரியா நோய்த் தொற்று தடுப்பு அமைப்புகளில் முக்கிய உறுப்பினராகவும் திகழ்கிறார்.

அத்தோடு, ஆபிரிக்காவில் வறுமையில் வாடும் குழந்தைகளுக்காக நிதியுதவி வழங்கியுள்ளதோடு, அங்கு அறக்கட்டளையும் நிறுவி உதவிகளை புரிந்து வருகின்றார் என்பது குறிப்பிடத்தக்கது.

கால்பந்து விளையாட்டில் 20 ஆண்டுக்காலங்கள் ஆதிக்கம் செலுத்தி வந்த டேவிட் பெக்காம், கழக மற்றும் தேசிய அணிகள் என மொத்தம் 762 போட்டிகளில் விளையாடி 130 கோல்களை அடித்துள்ளார்.

இங்கிலாந்து தேசிய அணிக்காக மட்டும், 115 போட்டிகளில் விளையாடி 17 கோல்களை அடித்துள்ளார். அத்தோடு மூன்று உலகக்கிண்ண தொடர்களிலும் விளையாடியுள்ளார்.

43 வயதான டேவிட் பெக்காம், 19 கழக கிண்ணங்களையும், 10 லீக் சம்பியன் பட்டங்களையும் வென்றுக் கொடுத்துள்ளார்.

ஆறு பீரிமியர் லீக் சம்பியன் லீக் பட்டங்கள், இரண்டு எஃப்.ஏ கிண்ணங்கள் மற்றும் சம்பியன்ஸ் லீக் கிண்ணங்களையும், ஒரு லா லிகா கிண்ணம் என ஏராளமான சம்பியன் பட்டங்கனை பெக்காம் வென்றுக் கொடுத்துள்ளார்.

இவர் முன்னணி கழக அணிகளான மென்செஸ்டர் யுனைடெட், ரியல் மெட்ரிட், ஏ.சி. மிலான், பரிஸ் செயிண்ட் ஜெர்மைன் ஆகிய கழக அணிகளுக்காகவும் விளையாடியுள்ளார்.

இந்த விருதை பெறும் மூன்றாவது இங்கிலாந்து வீரர் இவராவார். இதற்கு முன்னதாக கடந்த 2002ஆம் ஆண்டு பொபி ராப்சனும், 2008ஆம் ஆண்டு பொபி சார்ல்டனும் இந்த விருதை பெற்றுள்ளனர்.

மேலும் செய்திகளை உடனுக்குடன் படிக்க, ஆதவன் Android Mobile App இனை, ஆதவன் IOS Mobile App இனை இங்கே கிளிக் செய்து தரவிறக்கம் செய்துகொள்ளுங்கள்.