Chrome Badge
athavannews.png
Athavan News switch to mobile site switch to desktop site

துரோகங்களை மறந்துவிடக்கூடாது: சம்பந்தன்

In இலங்கை
Updated: 04:58 GMT, Feb 7, 2018 | Published: 04:34 GMT, Feb 7, 2018 |
0 Comments
1144
This post was written by : Puvanes
sampanthan001

ஏக்கிய இராச்சிய என்பதன் பொருள் பிரிக்க முடியாத, பிரிபடாத ஒருமித்த நாடு. ஏக்கிய இராச்சிய என்பது ஆட்சிமுறையை குறிக்கும் சொல் இல்லை அது பிரதேசத்தை குறிக்கிறது என தமிழ் தேசிய கூட்டமைப்பின் தலைவரும் எதிர்க்கட்சி தலைவருமான இரா. சம்பந்தன் தெரிவித்துள்ளார்.

யாழ்.மாநகர சபை தேர்தலில் போட்டியிடும் வேட்பாளர்களுக்கு அதரவு தெரிவித்து யாழ்.சங்கிலியன் பூங்காவில் நேற்று (செவ்வாய்க்கிழமை) இரவு இடம்பெற்ற பரப்புரை கூட்டத்தில் உரையாற்றும் போதே அவர் இதனைத் தெரிவித்தார்.

தொடர்ந்தும் அவர் அங்கு கருத்து தெரிவிக்கையில்,

இடைக்கால அறிக்கையில் ஒன்றும் இல்லை என கூறுகிறார்கள். இடைக்கால அறிக்கையில் ஒற்றையாட்சி என்ற சொல் தமிழில் இல்லை. ஏக்கிய இராச்சிய என்ற சொல் சிங்களத்தில் உள்ளது. அதனை சிங்கள மக்கள் விரும்புகின்றார்கள். சிங்கள மக்கள் நினைக்கிறார்கள் அந்த சொல் இருந்தாலே நாடு பிரிக்கப்படாது என. நீதிமன்றில் விவாதத்திற்கு வந்தால்கூட அரசியலமைப்பில் கூறப்பட்ட சொல்லை மீறி எதனையும் யாரும் கூற இயலாது.

பகிரப்பட்ட அதிகாரங்கள் மீள பெறமுடியாது. பகிரப்பட்ட அதிகாரங்களில் அரசு தலையிட முடியாது. அதிகாரங்கள் பகிரப்பட்ட ஒழுங்கில் மாற்றம் செய்யவும் முடியாது.

வடகிழக்கு இணைப்பு தொடர்பில் வடகிழக்கு ஒரு மாகாணமாக கருதப்படலாம், இரு மாகாணங்களாக கருதப்படலாம், வடகிழக்கை இணைக்க சர்வஜன வாக்கெடுப்பு நடத்தப்படவேண்டும். இந்த விடயங்கள் தொடர்பாக முடிவுகள் இல்லை. முஸ்லிம் தலைவர்களுடன் பேசி இந்த விடயம் தொடர்பாக முடிவுக்கு வரவேண்டும். அவர்களை உதாசீனம் செய்து இந்த விடயத்தை நிறைவேற்ற முடியாது.

நாங்கள் மக்களால் தேர்வு செய்யப்பட்டவர்கள் மக்களுக்கு தேவையானதை செய்யவேண்டும். அதேபோன்று மக்கள் ஏற்காத ஒரு தீர்வை நாங்கள் ஏற்கப்போவதில்லை.

இந்த விடயத்தில் கோசங்களின் அடிப்படையில் முடிவுகளை எடுக்க முடியாது. மக்களுக்கு துரோகம் செய்ய மாட்டோம். சுதந்திரத்திற்கு முன்னரும், பின்னரும் நாங்கள் பல சந்தர்ப்பங்களை இழந்துள்ளோம். அதேபோல் இப்போதும் இழக்க முடியாது.

அகில இலங்கை தமிழ் காங்கிரஸ், தமிழ்தேசிய மக்கள் முன்னணி என வருகிறார்கள். இவர்கள் யார்? பண்டா – செல்வா ஒப்பந்தம் செய்யப்பட்டபோது அதனை எதிர்த்தார்கள், டட்லி- செல்வா ஒப்பந்தம் செய்யப்பட்டபோது அதனையும் எதிர்த்தார்கள்.

தந்தை செல்வா சமஷ்டி கோரிக்கையை முன்வைத்தபோது அதனையும் எதிர்த்தார்கள். ஆனால் இப்போது எமக்கு சமஷ்டி தெரியாது எனவும் தங்களுக்கே சமஷ்டி தெரியும் எனவும் கூறுகிறார்கள்.

ஏன் சமஷ்டியை எதிர்த்தவர்கள் இன்று சமஷ்டி எங்களுக்கே தெரியும் எனக் கூறுகின்றார்கள். இதேபோல் மற்றொரு தரப்பு மஹிந்த ராஜபக்ஷவுடன் 2004-2015 வரை ஒட்டிக் கொண்டிருந்தவர்கள்,

மஹிந்த ராஜபக்ஷ செய்த துரோகங்களை அங்கீகரித்தவர்கள், மஹிந்த 13ஆம் திருத்தச்சட்டத்தை நீக்க முயற்சித்தபோது மௌனமாக இருந்தவர்கள், 18ஆம் அரசியலமைப்பு சீர்திருத்தத்தை கொண்டுவந்தபோது ஆதரித்து 3ல், 2 என ஆதரவை கொடுத்தவர்கள் இன்று யாழ்ப்பாணத்தில், திருகோணமலையில் போட்டியிடுகிறார்கள்.

தமிழ் மக்களின் உரிமைகளுக்கு எதிராக மஹிந்த செயற்பட்டபோது ஒவ்வொரு சந்தர்ப்பங்களிலும் உதவியர்கள் இப்போது வாக்கு கேட்கிறார்கள். இவர்களிடம் தமிழ் மக்கள் தனிப்பட்ட முறையில் உதவிகளை பெற்றிருக்கலாம். அதற்காக தமிழ் மக்களுக்கு துரோகம் செய்த கட்சியை ஆதரிக்க கூடாது.

தமிழ்தேசிய கூட்டமைப்பு மக்களால் தெரிவு செய்யப்பட்ட கட்சி 56ஆம் ஆண்டு தொடக்கம் தொடர்ந்து செயற்பட்டு வந்துள்ளது. 30 வருட ஆயுதப்போராட்டத்தில் பல துன்பங்களை சந்தித்தோம். பல ஆயிரக்கணக்கான இளைஞர்கள் உயிரிழந்தார்கள் அந்த நிலை மாற்றப்படவேண்டும்.

அதற்காக தற்போது கிடைத்துள்ள சந்தர்ப்பத்தை சரியாக பயன்படுத்தவேண்டும். பதவிகளுக்காக உங்களை கைவிடமாட்டோம். இவற்றை புரிந்து எங்கள் நிலைப்பாடு எங்கள் பங்களிப்பு அவர்களுடைய நிலைப்பாடு சரித்திரம் இவற்றை அறிந்து ஒற்றுமையாக ஒருமித்து தமிழ்தேசிய கூட்டமைப்புக்கு முழுமையான ஆதரவினையும், ஒத்துழைப்பையும் வழங்கவேண்டும் என சம்பந்தன் மேலும் தெரிவித்தார்.

toon

ஆதவன் செய்திகளை E-mail இல் பெற்றுக்கொள்ள பதிவுசெய்யுங்கள்.

Subscribe
bg

உங்கள் கருத்துக்கள்

அன்புள்ள வாசகர்களே, நீங்கள் தெரிவிக்கும் கருத்துகளுக்கு நிர்வாகம் எவ்விதத்திலும் பொறுப்பாகாது. கருத்துக்கள் தகுந்த தணிக்கைக்குப் பிறகே பதிவேற்றம் செய்யப்படுகின்றன. எனவே நாகரீகமான கருத்துக்களை மட்டுமே பதிவு செய்யுமாறு வாசகர்கள் கேட்டுக்கொள்ளபடுகின்றனர். முக்கியமான புலங்கள் குறிக்கப்பட்டுள்ளன *

தமிழில் பதிவிடுவதற்கு Google Input Toolsயை பயன்படுத்தவும்.

  Type Comments in Tamil language (Press Ctrl+g to toggle between English and Tamil)