இந்திய நாடாளுமன்ற தேர்தல் – 4ஆம் கட்ட வாக்குப்பதிவு ஆரம்பம்!

In இந்தியா April 29, 2019 3:10 am GMT 0 Comments 2301 by : Krushnamoorthy Dushanthini

இந்திய நாடாளுமன்ற தேர்தலின் 4ஆம் கட்ட தேர்தல் இன்று (திங்கட்கிழமை) ஆரம்பமாகியுள்ளது. இதன்படி 9 மாநிலங்களுக்கான 72 தொகுதிகளில் இத்தேர்தல் இடம்பெறுகிறது.

பீகார், ஜார்கண்ட், மத்திய பிரதேசம், மராட்டியம், ஒடிசா, ராஜஸ்தான், உத்தரபிரதேசம், மேற்கு வங்காளம், காஷ்மீர் ஆகிய மாநிலங்களிலேயே இத்தேர்தல் நடைபெறுகின்றது.

இந்த தொகுதிகளில் போட்டியிடுவதற்காக 945 வேட்பாளர்கள் களத்தில் உள்ளனர். அத்துடன் 12 கோடியே 80 இலட்சம் வாக்காளர்கள் வாக்களிக்க தகுதி பெற்றுள்ள அதேவேளை, 1 இலட்சத்து 40 ஆயிரத்து 849 வாக்குச்சாவடிகள் அமைக்கப்பட்டுள்ளன.

இந்த தேர்தலை பொருத்தவரையில் மும்பை வடக்கு தொகுதியில் நடிகை ஊர்மிளாவும், பாரதிய ஜனதா கட்சி வேட்பாளர் கோபால் ஷெட்டியும் களத்திலுள்ளனர். அத்துடன் பீகாரில் பாரதிய ஜனதா தளம் சார்பாக மத்திய அமைச்சர் கிரிராஜ்சிங்கும், இந்திய கம்யூனிஸ்ட் கட்சி சார்பாக மாணவர் சங்க தலைவர் கன்னையா குமாரும் போட்டியிடுகின்றனர். நாடாளுமன்ற தேர்தலுடன் இணைந்து ஒடிசா சட்டசபையின் 42 தொகுதிகளுக்கான தேர்தலும் இன்று நடைபெறுகின்றது.

அத்துடன் குறித்த பகுதிகளில் பொலிஸ் மற்றும் இராணுவத்தினர் குவிக்கப்பட்டு பாதுகாப்பு பலப்படுத்தப்பட்டுள்ளமை குறிப்பிடத்தக்கது.