இந்தோனேசிய தேர்தல்: ஜொகோ விடோடோ முன்னிலை

In உலகம் April 17, 2019 10:20 am GMT 0 Comments 2640 by : Varshini

இந்தோனேசிய தேர்தலின் தற்போதைய நிலைவரப்படி ஜனாதிபதி ஜொகோ விடோடோ முன்னிலையில் உள்ளார்.

அந்நாட்டின் ஜனாதிபதி தேர்தல், பொதுத் தேர்தல் மற்றும் உள்ளுர் தேர்தல் ஆகியவை ஒரேநாளில் இன்று (புதன்கிழமை) நடைபெற்றது. வாக்களிப்பு முடிந்த மறுகணமே வாக்கெண்ணும் நடவடிக்கைகள் ஆரம்பாகிவிட்டன.

இதுவரை 51 வீதமான வாக்குகள் எண்ணப்பட்டுவிட்டதாக அந்நாட்டு தகவல்கள் தெரிவிக்கின்றன.

தேர்தல் பிரசாரங்கள் கடந்த 6 மாதகாலமாக சூடுபிடித்த நிலையில், அதில் நாட்டின் பொருளாதாரம் மற்றும் மதம் தொடர்பான விடயங்கள் முன்னிலைப்படுத்தப்பட்டன. தற்போதைய ஜனாதிபதி விடோடோவிற்கும் முன்னாள் இராணுவத் தளபதி பிரபுவோ சுபியான்டோவிற்கும் இடையில் கடும் போட்டி காணப்பட்டது.

மூலோபாய மற்றும் சர்வதேச ஆய்வுகளுக்கான மையம் நடத்திய முன்கூட்டிய கருத்துக் கணிப்புகளில், விடோடோவிற்கு 56.7 சதவீத வாக்குகளும் பிரபுவோவிற்கு 43.3 சதவீத வாக்குகளும் கிடைக்குமென தெரிவித்திருந்தது.

உலகின் மூன்றாவது ஜனநாயக நாடான இந்தோனேசியாவில் அந்நாட்டு ஜனாதிபதி, நாடாளுமன்ற உறுப்பினர்கள் மற்றும் பிராந்திய சபைகளுக்கான உறுப்பினர்களை தெரிவுசெய்யும் மூன்று தேர்தல்களும் ஒரே நாளில் நடத்தப்பட்ட முதலாவது சந்தர்ப்பம் இதுவென்பது குறிப்பிடத்தக்கது.