இலங்கையில் அதிகரித்து வரும் கொரோனா மரணங்கள்

In இலங்கை February 13, 2021 3:19 am GMT 0 Comments 1172 by : Yuganthini

இலங்கையில் கொரோனா வைரஸ் தொற்றாளர்களின் எண்ணிக்கை 384 ஆக அதிகரித்துள்ளது.

நேற்று (வெள்ளிக்கிழமை) மேலும் 5 கொரோனா மரணங்கள் பதிவானமையை தொடர்ந்து இந்த அதிகரிப்பு ஏற்பட்டுள்ளதாக அரசாங்க தகவல் திணைக்களம் தெரிவித்துள்ளது.

அரசாங்க தகவல் திணைக்களம் வெளியிட்டுள்ள அறிக்கையில் கூறப்பட்டுள்ளதாவது, கொட்டகலை பகுதியை சேர்ந்த 63 வயதுடைய ஆணொருவர் கொட்டகலை வைத்தியசாலையில் சிகிச்சைப் பெற்று வந்த நிலையில் கொரோனா வைரஸ் தொற்று உறுதி செய்யப்பட்டுள்ளது.

இதனையடுத்து அவர் நுவரெலியா மாவட்ட வைத்தியசாலையில் அனுமதிக்கப்பட்ட நிலையில் கடந்த 9 ஆம் திகதி உயிரிழந்துள்ளார். கொவிட்19 நிமோனியா காரணமாக அவர் மரணித்துள்ளதாக தெரிவிக்கப்படுகின்றது.

அதேபோன்று மத்துகமை பகுதியை சேர்ந்த 79 வயதுடைய ஆணொருவருக்கு அநுராதபுரம் பொது வைத்தியசாலையில் தொற்று ஏற்பட்டிருப்பது கண்டறியப்பட்டது.

அதனைத் தொடர்ந்து அவர் அநுராதபுரம் ஆதார வைத்தியசாலையில் அனுமதிக்கப்பட்டு சிகிச்சை வழங்கப்பட்டு வந்த நிலையில் கடந்த 11 ஆம் திகதி உயிரிழந்துள்ளார். அவரது மரணத்திற்கான காரணம் கொவிட்19 நிமோனியா, சிறுநீரக பாதிப்பு நிலைமை என தெரிவிக்கப்பட்டுள்ளது.

மேலும் கொட்டாஞ்சேனை பகுதியை சேர்ந்த 69 வயதான ஆணொருவர், கொழும்பு தனியார் வைத்தியசாலையில் சிகிச்சை பெற்று வந்த நிலையில், கொவிட் 19 தொற்றுறுதியானவராக கண்டறியப்பட்டார். அதன்பின்னர் அவர் முல்லேரியா ஆதார வைத்தியசாலைக்கு மாற்றப்பட்டு சிகிச்சைப் பெற்று வந்த நிலையில் கடந்த 11 ஆம் திகதி உயிரிழந்துள்ளார்.

கொவிட்19 தொற்றால் மோசமடைந்த நீரிழிவு நோய் நிலைமை அவரது மரணத்திற்கான காரணம் என அறிவிக்கப்பட்டுள்ளது.

இதேவேளை கொழும்பு 8 பகுதியை சேர்ந்த 59 வயதான ஆணொருவர், வெலிசறை வைத்தியசாலையில் சிகிச்சை பெற்று வந்த நிலையில் கடந்த 5 ஆம் திகதி உயிரிழந்துள்ளார்.கொவிட்19 நிமோனியா மற்றும் சுவாசத்தொகுதி செயலிழந்தமை காரணமான அவர் மரணித்ததாக அறிவிக்கப்பட்டுள்ளது.

கொழும்பு 12 பகுதியை சேர்ந்த 49 வயதான ஆணொருவர் வெலிசறை வைத்தியசாலையில் சிகிச்சை பெற்று வந்த நிலையில் கடந்த மாதம் 28 ஆம் திகதி உயிரிழந்தார்.

கொவிட்19 நிமோனியா, நுரையீரல் நோய் நிலை காரணமாக அவர் மரணித்துள்ளார் என அறிக்கையில் கூறப்பட்டுள்ளது.