தொழிற்கட்சியுடனான சமரசம் பிரெக்ஸிற்றை பாதுகாக்க உதவும்: லீட்ஸம்

In இங்கிலாந்து April 8, 2019 6:43 am GMT 0 Comments 2600 by : Varshini

தொழிற்கட்சியுடன் சமரசத்தை ஏற்படுத்திக்கொள்வது, பிரெக்ஸிற் திட்டத்தை நாடாளுமன்றில் பெரும்பான்மையுடன் நிறைவேற்றிக்கொள்ள உதவுமென பாராளுமன்ற அவைத் தலைவர் ஆண்ட்ரியா லீட்ஸம் தெரிவித்துள்ளார். அதற்கான சமிக்ஞைகளை அரசாங்கம் வெளிப்படுத்தியுள்ளதென்றும் அவர் கூறியுள்ளார்.

பிரெக்ஸிற் சர்ச்சைகள் தொடர்கின்ற நிலையில், அரசாங்கத்திற்கும் எதிர்க்கட்சியான தொழிற்கட்சிக்கும் இடையில் பேச்சுவார்த்தை இடம்பெற்று வருகின்றது. இந்நிலையில், சர்வதேச ஊடகமொன்றிற்கு வழங்கியுள்ள செவ்வியில் லீட்ஸம் இவ்வாறு குறிப்பிட்டுள்ளார்.

பிரெக்ஸிற்றின் பின்னர் ஐரோப்பிய ஒன்றிய சுங்கத்தில் நிலைத்திருப்பது தொடர்பான பிரதமர் மேயின் திட்டத்தை தொழிற்கட்சி ஆதரிப்பதற்கான சாத்தியப்பாடு காணப்படுவதாகவும் கூறியுள்ளார்.

ஐரோப்பிய ஒன்றியத்திலிருந்து பிரித்தானியா விலகுவதற்காக காலக்கெடு எதிர்வரும் 12ஆம் திகதியாகும். எனினும், அதனை ஜூன் 30வரை நீடிக்குமாறு ஐரோப்பிய ஒன்றியத்திடம் பிரதமர் தெரேசா மே கோரிக்கை விடுத்துள்ளார். அதனை நிறைவேற்றிக்கொள்ள, நாளை மறுதினம் (புதன்கிழமை) நடைபெறவுள்ள ஐரோப்பிய ஒன்றிய மாநாட்டில் புதிய திட்டத்தை முன்வைப்பது அவசியமாகும்.