நாட்டில் கொரோனா தொற்றினால் மேலும் ஏழு பேர் உயிரிழப்பு!

In இலங்கை November 29, 2020 4:27 pm GMT 0 Comments 1666 by : Litharsan

நாட்டில் மேலும் ஏழு பேர் கொரோனா வைரஸ் தொற்றினால் மரணித்துள்ளதாக சுகாதார சேவைகள் பணிப்பாளர் நாயகம் உறுதிப்படுத்தியுள்ளார்.

இதன்படி, கொழும்பைச் சேர்ந்த 50 வயது பெண்ணுக்கு கொரோனா தொற்று கண்டறியப்பட்ட நிலையில் முல்லேரியா ஆதார வைத்தியசாலையில் தீவிர சிகிச்சைப் பிரிவில் அனுமதிக்கப்பட்டிருந்தார்.

இந்நிலையில், அவர் நேற்று 28ஆம் திகதி உயிரிழந்த நிலையில், இறப்புக்கான காரணம் கொரோனா தொற்றுடனான நிமோனியா மற்றும் நாட்பட்ட நுரையீரல் நோய் எனத் தெரிவிக்கப்பட்டுள்ளது.

மேலும், கொதட்டுவ பகுதியைச் சேர்ந்த 48 வயது ஆணொருவர் கடந்த 27ஆம் திகதி உயிரிழந்தார்.

இவருக்கு நாட்பட்ட நுரையீரல் நோய், நீரிழிவு மற்றும் கொரோனா தொற்றுடனான நிமோனியா நிலைமையே இறப்புக்கான காரணமாகும்.

அத்துடன், மொரட்டுவ பகுதியைச் சேர்ந்த 73 வயதுடைய ஆணொருவர் இன்று கொரோனா தொற்றினால் உயிரிழந்தார்.

இவர் கொரோனா வைரஸ் தொற்று கண்டறியப்பட்டு ஹோமகம ஆதார மருத்துவமனையில் சிகிச்சை பெற்று வந்தார். கொரோனா தொற்று நிமோனியா அதிகரித்தமையே இவரின் இறப்புக்கான காரணமாகும்

மேலும், சிலாபத்தைச் சேர்ந்த 70 வயது ஆணொருவர் இன்று சிலாபம் தள வைத்தியசாலையில் உயிரிழந்தார்.

இவரிக் உயிரிழப்புக்கு நீரிழிவு நோய், உயர் இரத்த அழுத்தம் மற்றும் கொரோனா தொற்றுடன் பக்கவாதம் ஏற்பட்டமையே காரணம் எனத் தெரிவிக்கப்பட்டுள்ளது.

மேலும், அக்குரஸ்ஸ பகுதியைச் சேர்ந்த 51 வயதுடைய பெண்ணொருவர் கடந்த 27ஆம் திகதி உயிரிழந்தார். கொரோனா தொற்றினால் பாதிக்கப்பட்டிருந்த இவர் கரப்பிட்டி போதனா வைத்தியசாலையிலிருந்து ஹோமாகம ஆதார வைத்தியசாலைக்கு மாற்றப்பட்டிருந்தார்.

இந்நிலையில், இவரது இறப்புக்கு கொரோனா தொற்று நிமோனியாவுடன் நாட்பட்ட சிறுநீரக நோய் காரணம் எனத் தெரிவிக்கப்பட்டுள்ளது.

இதையடுத்து, கொழும்பு-13 பகுதியைச் சேர்ந்த 90 வயதுடைய பெண்ணொருவர் இன்று உயிரிழந்தார். இவரது இறப்புக்கான காரணம் கொரோனா தொற்றுடனான நிமோனியா நிலையெனத் தெரிவிக்கப்பட்டுள்ளது.

மேலும், மருதானையைச் சேர்ந்த 78 வயதுடைய ஆணொருவர் மருத்துவமனையில் அனுமதிக்கப்பட்ட நிலையில் 27ஆம் திகதி இறந்தார்.

இவருக்கு கொரோனா நோய்த் தொற்று காரணமாக ஏற்பட்ட நுரையீரல் செயலிழப்பு மரணத்திற்குக் காரணம் எனத் தெரிவிக்கப்பட்டுள்ளது.

இந்நிலையில், இலங்கையில் கொரோனா வைரஸ் தொற்றினால் உயிரிழந்தவர்களின் மொத்த எண்ணிக்கை 116ஆக அதிகரித்துள்ளது.