யாழில் கடை உடைத்து கொள்ளையிட்ட சம்பவத்தில் ஒருவர் கைது!

In இலங்கை April 4, 2019 5:23 am GMT 0 Comments 2570 by : Jeyachandran Vithushan

யாழ்ப்பாணம் நாவலர் வீதியில் உள்ள கடை ஒன்றை உடைத்து சி.சி.ரி.வி. கமெராக்கள் மற்றும் அதனைப் பொருத்தும் சாதனங்களைத் திருடிய குற்றச்சாட்டில் ஒருவர் கைது செய்யப்பட்டுள்ளார்.

நேற்று (புதன்கிழமை) கைது செய்யப்பட்ட குறித்த சந்தேகநபரிடமிருந்து திருடப்பட்ட பொருள்களும் மீட்கப்பட்டதாகப் பொலிஸார் தெரிவித்துள்ளனர்.

யாழ்ப்பாணம் நாவலர் வீதியில் உள்ள பித்தளை, இரும்பு பொருள்கள் விற்பனை செய்யும் கடையில் பொருத்தப்பட்டிருந்த பாதுகாப்புக் கமராக்கள் மற்றும் அதனுடன் தொடர்புடைய சாதனங்கள் கடந்த டிசெம்பர் மாதம் திருட்டுப் போயிருந்தன. எனினும் இது தொடர்பாக பொலிஸில் முறைப்பாடு வழங்கப்படவில்லை.

யாழ். மூத்த பொலிஸ் அத்தியட்சகர் தினேஷ் கருணாரத்னவின் கீழ் செயற்படும் சிறப்புக் குற்றத் தடுப்புப் பிரிவினர், கொட்டடியைச் சேர்ந்த இளைஞன் ஒருவரை சந்தேகத்தின் அடிப்படையில் நேற்றுக் கைது செய்தனர். அவருடமிருந்து சி.சி.ரி.வி. கமெராக்கள் மற்றும் அதனைப் பொருத்தும் சாதனங்கள் கைப்பற்றப்பட்டன.

அவை தொடர்பாக சந்தேகநபர் வழங்கிய வாக்குமூலத்தின் அடிப்படையில் திருடப்பட்ட கடையின் உரிமையாளருக்கு அறிவிக்கப்பட்டது. இதனையே அடுத்து கைப்பற்றப்பட்ட பொருட்களுடன் சந்தேகநபரும் யாழ். பொலிஸ் நிலையத்தில் ஒப்படைக்கப்பட்டுள்ளார்.