வெளிநாட்டு அகதிகளை வவுனியாவில் குடியேற்ற அனுமதிக்க முடியாதென கூட்டாக அறிவிப்பு!

In இலங்கை May 4, 2019 8:22 am GMT 0 Comments 2093 by : Benitlas

இலங்கையில் தங்கியுள்ள வெளிநாட்டு அகதிகளுக்கு உயிர் அச்சுறுத்தல் ஏற்பட்டுள்ளதாக காரணம் காட்டி வவுனியாவில் அவர்களை குடியேற்றுவதை அனுமதிக்க முடியாது என வவுனியா மாவட்டத்தில் உள்ள உள்ளுராட்சி மன்றங்களின் தலைவர்கள் நால்வர் கூட்டாக தெரிவித்துள்ளனர்.

வவுனியா நகரசபை தலைவரின் அலுவலகத்தில் இன்று (சனிக்கிழமை) இடம்பெற்ற ஊடக சந்திப்பின்போதே வவுனியா நகரசபை தலைவர் இ.கௌதமன், வவுனியா தெற்கு தமிழ் பிரதேச சபையின் தலைவர் து.நடராஜசிங்கம், வவுனியா வடக்கு பிரதேச சபையின் தலைவர் எஸ்.தணிகாசலம் மற்றும் வவுனியா தெற்கு சிங்கள பிரதேசசபையின் உபதலைவர் வசந்த ஆகியோர் இவ்வாறு கூட்டாக அறிவித்துள்ளனர்.

இதன்போது கருத்து வெளியிட்டுள்ள அவர்கள், “எமது மக்கள் இதுவரை சீராக மீள்குடியேற்றம் செய்யப்படாமலும் அவர்களுக்கான அடிப்படை வசதிகள் பூர்த்தி செய்யப்படாமலும் உள்ள நிலையில் நீர்கொழும்பு பகுதியில் தங்கியுள்ள பாகிஸ்தான் உட்பட வெளிநாட்டு அகதிகளை வவுனியாவில் தங்கவைக்க எடுக்கப்படும் நடவடிக்கையினை உள்ளுராட்சி மன்ற தலைவர்களாகிய நாம் ஏற்றுக்கொள்ள முடியாது” என தெரிவித்துள்ளனர்.

இதேவேளை, குறித்த ஊடக சந்திப்பில் வவுனியா செட்டிகுளம் பிரதேச சபையின் தலைவர் கலந்துகொள்ளவில்லை என்பது குறிப்பிடத்தக்கது.