உலகக் கிண்ணத்துடன் நாடு திரும்பிய வீரர்கள் – பிரதமர் மோடியையும் நேரில் சந்தித்தனர்

உலகக் கோப்பை வென்ற இந்திய கிரிக்கெட் வீரர்கள் பிரதமர் நரேந்திர மோடியை நேரில் சந்தித்து வாழ்த்து பெற்றுள்ளதாக இந்திய ஊடகங்கள் செய்தி வெளியிட்டுள்ளளன.

கடந்த சனிக்கிழமை பார்படாஸில் நடைபெற்ற T20 உலகக் கோப்பை இறுதிச் சுற்றில் தென்னாப்பிரிக்காவை வீழ்த்தி இந்திய அணி சாம்பியன் பட்டத்தை வென்றது.

T20 உலகக் கோப்பையை, இரண்டாவது முறையாகவும் இந்திய அணி வென்றெடுத்துள்ளது.

உலகக் கோப்பையை தன் வசப்படுத்திக்கொண்ட இந்திய அணிக்கு, அட்லாண்டிக் பெருங்கடலில் ஏற்பட்ட சூறாவளி காரணமாக தாயகம் திரும்புவதில் சிக்கலான சூழல் ஏற்பட்டது.

இந்நிலையில், வானிலை சீரானதை தொடர்ந்து நேற்று (03 புதன்கிழமை) பிற்பகல் 2 மணியளவில் பார்படாஸில் இருந்து தனி விமானம் மூலம் இந்திய வீரர்கள் புறப்பட்டு இன்று காலை 6 மணியளவில் டெல்லியை வந்தடைந்தனர்.

இதன்போது, டெல்லி விமான நிலையத்தில் குவிந்த இரசிகர்கள் இந்திய வீரர்களுக்கு வரவேற்பளித்த நிலையில், பிரதமர் நரேந்திர மோடியை இந்திய வீரர்கள் மற்றும் பயிற்சியாளர்கள் நேரில் சந்தித்தனர்.

உலகக் கோப்பையை பிரதமர் நரேந்திர மோடியிடம் கொடுத்து வாழ்த்துப் பெற்ற வீரர்கள், தொடர்ந்து, பிரதமர் அளித்த விருந்திலும் பங்கேற்றிருந்தனர்.

இதனையடுத்து, மும்பை செல்லும் இந்திய வீரர்கள் திறந்தவெளி வாகனத்தில் இரசிகர்களுக்கு மத்தியில் பேரணியாக சென்றுள்ளமை குறிப்பிடத்தக்கது.