கொவிட் வைரஸூக்கு எதிராக தயாரிக்கப்பட்டுள்ள மாத்திரையை பயன்படுத்த பிரித்தானியா அனுமதி!

கொரோனா வைரஸ்க்கு (கொவிட்-19) எதிராக தயாரிக்கப்பட்டுள்ள மாத்திரையை பயன்படுத்த பிரித்தானிய அரசாங்கம் ஒப்புதல் அளித்துள்ளது.

மோல்னுபிராவிர் எனப்படும் இந்த மருந்தை மெர்க் நிறுவனம் தயாரித்துள்ளது.

மாத்திரை எவ்வளவு விரைவாக கிடைக்கும் என்பது உடனடியாகத் தெரியவில்லை என்றாலும், கொரோனா வைரசைக் கட்டுப்படுத்த மாத்திரையை அங்கீகரித்துள்ள முதல் நாடு என்ற பெருமையை பிரித்தானியா பெற்றுள்ளது.

கொவிட்-19 தொற்றுக்கு நேர்மறை சோதனை செய்த 18 வயது மற்றும் அதற்கு மேற்பட்ட வயது வந்தவர்களுக்காக இந்த மாத்திரை உரிமம் பெற்றது.

லேசானது முதல் மிதமான கொவிட்-19 பாதிப்பு உள்ளவர்கள், வீட்டில் இருப்பவர்கள் ஐந்து நாட்களுக்கு ஒரு நாளைக்கு இரண்டு முறை எடுத்துக்கொள்ளலாம்.

இதுதொடர்பாக, பிரித்தானிய சுகாதாரத் துறை செயலாளர் சஜித் ஜாவித் கூறுகையில், ‘பலவீனமான மற்றும் நோய் எதிர்ப்பு குறைபாடு உள்ளவர்களுக்கு இந்த சிகிச்சை ஒரு கேம்சேஞ்சர். இன்று நம் நாட்டிற்கு ஒரு வரலாற்று சிறப்புமிக்க நாள்.

நாங்கள் அரசாங்கம் மற்றும் தேசிய சுகாதார சேவையுடன் இணைந்து ஒரு தேசிய ஆய்வின் மூலம் நோயாளிகளுக்கு மோல்னுபிராவிரை விரைவில் பயன்படுத்துவதற்கான திட்டங்களை வகுக்கிறோம்’ என கூறினார்.

தடுப்பூசியை விட மாத்திரை தயாரிப்பது எளிது என்பதால், விரைவில் இயல்பு நிலைக்கு திரும்ப முடியும் என நிபுணர்கள் நம்பிக்கை வெளியிட்டுள்ளனர்.

மேலும், தடுப்பூசிக்கு சரியாக பதிலளிக்காதவர்களுக்கு இந்த சிகிச்சை மிகவும் முக்கியத்துவம் வாய்ந்ததாக இருக்கும் என்று மருத்துவர்கள் தெரிவித்தனர்.

அமெரிக்கா, ஐரோப்பிய ஒன்றியம் மற்றும் பிற இடங்களில் உள்ள கட்டுப்பாட்டாளர்களிடமும் மோல்னுபிரவீர் மதிப்பாய்வு நிலுவையில் உள்ளது.

நவம்பர் பிற்பகுதியில் மாத்திரையின் பாதுகாப்பு மற்றும் செயல்திறனை ஆராய சுயாதீன நிபுணர்களின் குழுவைக் கூட்டுவதாக அமெரிக்க உணவு மற்றும் மருந்து நிர்வாகம் கடந்த மாதம் அறிவித்தது.

இந்த ஆண்டின் இறுதிக்குள் 10 மில்லியன் சிகிச்சை மாத்திரைகளை உருவாக்க முடியும் என்று மெர்க் கூறியுள்ளது. ஆனால் அந்த விநியோகத்தின் பெரும்பகுதி ஏற்கனவே உலகெங்கிலும் உள்ள அரசாங்கங்களால் வாங்கப்பட்டுள்ளது.

கடந்த ஒக்டோபர் மாதம் 480,000 மோல்னுபிராவிர் மாத்திரைகளை பெற்றதாக பிரித்தானிய அதிகாரிகள் அறிவித்தனர்.

மெர்க் மற்றும் அதன் கூட்டாளியான ரிட்ஜ்பேக் பயோதெரபியூடிக் ஆகியவை கடுமையான நோய் அல்லது மருத்துவமனையில் அனுமதிக்கப்படும் ஆபத்தில் இருக்கும் லேசான முதல் மிதமான கொவிட்-19 உள்ள பெரியவர்களுக்கு சிகிச்சையளிக்க உலகெங்கிலும் உள்ள கட்டுப்பாட்டாளர்களிடம் மருந்துக்கான அனுமதியைக் கோரியுள்ளன.