பிரிட்டனில் நிதிநிலை அறிக்கை தாக்கல் செய்ய இன்னும் இரண்டு வாரங்களுக்கும் குறைவாக உள்ள நிலையில், பிரதமர் சர் கெய்ர் ஸ்டார்மர் மற்றும் நிதியமைச்சர் ரேச்சல் ரீவ்ஸ் ஆகியோர் வருமான வரி விகிதங்களை உயர்த்தும் திட்டத்தை திடீரெனக் கைவிட்டுள்ளனர். இது அந்நாட்டு அரசியலில் ஒரு பெரும் திருப்புமுனையாகப் பார்க்கப்படுகிறது.
இந்தத் திடீர் முடிவுக்குக் காரணம், ஆளும் லேபர் கட்சியில் உள்ள அதிருப்தி அடைந்த நாடாளுமன்ற உறுப்பினர்கள் மற்றும் வாக்காளர்களின் கடும் எதிர்ப்பைப் பற்றிய அச்சமே என்று கூறப்படுகிறது. இந்த வரி உயர்வுத் திட்டம் குறித்து டவுனிங் வீதிக்குள் கடந்த சில நாட்களாகக் கடும் குழப்பம் நிலவியதாலேயே இந்தப் பின்வாங்கல் ஏற்பட்டுள்ளது.
கடந்த வாரம் செய்தியாளர் கூட்டத்தில் பேசிய நிதியமைச்சர் ரேச்சல் ரீவ்ஸ், பொருளாதாரத்தை ஸ்திரப்படுத்துவதற்காக கடனை அதிகரிக்கவோ அல்லது செலவுகளைக் குறைக்கவோ முடியாது என்றும், அதனால் “ஒவ்வொருவரும் தங்கள் பங்கைச் செலுத்த வேண்டும்” என்றும் கூறி, வரி உயர்வுக்கு வழி வகுப்பதாகக் காணப்பட்டார். ஆனால் இப்போது, அந்தக் கருத்திலிருந்து அரசு பின்வாங்கியுள்ளது.
