இயற்கை அனர்த்தங்களால் ஏற்படும் விளைவுகள் காரணமாக, இந்திய எல்லையை தாண்டி, இந்திய கரையோர காவல் படையினரால் கைது செய்யப்படும் இலங்கை மீனவர்கள், பல காலங்களாக சிறையில் அடைக்கப்பட்டுள்ளதாக, ஈழ மக்கள் ஜனநாயக கட்சியின் (E.P.D.P.) மன்னார் மாவட்ட நிர்வாக செயலாளரும் அமைச்சரின் மாவட்ட இணைப்பாளருமான சுப்பையா சந்துரு தெரிவித்துள்ளார்.
எனினும் இவ்விடயம் குறித்து கடற்றொழில் அமைச்சரின் கவனத்திற்கு கொண்டுச் சென்றதையடுத்து, அமைச்சரின் முயற்சியால் மீனவர்கள் விடுதலை செய்ப்பட்டதாக அவர் குறிப்பிட்டார்.
ஈழ மக்கள் ஜனநாயக கட்சியின் மன்னார் மாவட்ட அலுவலகத்தில் இடம்பெற்ற ஊடக சந்திப்பின்போதே அவர் இதனை தெரிவித்தார்.
இதன்போது, மன்னார் -தலைமன்னார் பகுதியை சேர்ந்த மீனவர்கள், 2023 ஆம் ஆண்டு நவம்பர் மாதம், இந்திய கடலோர காவல் படையினரால் எல்லை தாண்டி மீன்பிடியில் ஈடுபட்டதாக குற்றஞ்சாட்டப்பட்டு கைது செய்யப்பட்டிருந்ததாக குறிப்பிட்டார்.
அவர்கள் கடந்த 5 மாதங்களுக்கு மேலாக இந்திய சிறைகளிலில் இருப்பதாகவும், அவர்களை விடுவிக்கக் கோரி அவர்களுடைய குடும்பத்தினர் தமது கட்சியை நாடியிருந்தாகவும் அவர் தெரிவித்தார்.
இவ்விடயத்தை தான் அமைச்சர் டக்ளஸ் தேவானந்தாவின் கவனத்துக்கு கொண்டுச் சென்றதையடுத்து, அமைச்சர் மேற்கொண்ட முயற்சியின் பலனாக இந்திய சிறைலிருந்த அனைத்து மீனவர்களும் கடந்த செவ்வாய்க்கிழமை நாடு திரும்பியதாக சுப்பையா சந்துரு தெரிவித்துள்ளார்.
இனிமேல் அவ்வாறான பிரச்சினைகள் இருக்கும் பட்சத்தில், அவை தமது கவனத்துக்கு கொண்டுவரப்பட்டால், தாம் நிச்சயம் அமைச்சரை தொடர்புகொண்டு மீனவர்களை விடுதலை செய்ய நடவடிக்கை எடுப்போம் என அவர் மேலும் தெரிவித்தார்.
