காட்டு யானைகள் அடிக்கடி நடமாடும் பகுதிகளில் பகல் நேரத்தில் இரவு நேர அஞ்சல் ரயில்களை இயக்க அதிகாரிகளிடம் ஒரு திட்டம் சமர்ப்பிக்கப்பட்டுள்ளதாக இலங்கை ரயில்வே திணைக்களத்தின் முகாமையாளர்கள் சங்கம் (SLRSMU) தெரிவித்துள்ளது.
அதேநேரம், பல இரவு நேர அஞ்சல் ரயில்களில் பயணிகள் இருக்கைகளை முன்பதிவு செய்ய முடியாததால் நேற்று (25) கடும் சிரமங்களை எதிர்கொண்டதாக சங்கத்தின் செயலாளர் கசுன் சாமர ஜெயசேகர தெரிவித்தார்.
இது தொடர்பாக மேலும் கூறிய அவர்,
நேற்று, கொழும்பிலிருந்து திருகோணமலைக்கும், கொழும்பிலிருந்து மட்டக்களப்புக்கும், மொரட்டுவையிலிருந்து காங்கேசன்துறைக்கும் செல்லும் இரவு அஞ்சல் ரயில்களுக்கான முன்பதிவுகளை ரயில்வே திணைக்களம் வெளியிடவில்லை.
இது தொடர்பில் திணைக்களத்தால் எந்த முன்னறிவிப்பும் வழங்கப்படவில்லை.
இதன் விளைவாக, நிலைய அதிபர்கள் பொதுமக்களின் விமர்சனங்களை எதிர்கொள்ள வேண்டியிருந்தது.
எங்கள் விசாரணையின் போது, ரயில்வே சாரதிகள் சங்கத்தின் வேண்டுகோளின் பேரில் ரயில்வே திணைக்களம் இந்த இரவு அஞ்சல் ரயில்களின் அட்டவணையை மாற்றியமைத்துள்ளதாக அறிந்தோம்.
இந்த ரயில்கள் எதிர்காலத்தில் பகல் நேரத்தில் இயக்கப்படும்.
இது உண்மையில் பொதுமக்களுக்கு வசதியாக அமையுமா என்பதுதான் இப்போது கவலை.
திருகோணமலை, மட்டக்களப்பு மற்றும் யாழ்ப்பாணத்தைச் சேர்ந்த மக்கள் வழக்கமாக இரவில் வந்து சேருவார்கள்.
இதனால் அவர்கள் மறுநாள் தங்கள் அத்தியாவசியப் பணிகளைச் செய்ய முடியும்.
பகல்நேர செயல்பாடுகளால், எதிர்பார்க்கப்படும் அளவிலான சேவையை வழங்க முடியுமா என்பது நிச்சயமற்றது – என்றார்.
