நாட்டின் உயர் நீதிமன்றங்களில் பணியாற்றும் நீதிபதிகளின் ஓய்வுபெறும் வயதை நீட்டிப்பதற்காக முன்மொழியப்பட்டுள்ள அரசியலமைப்புத் திருத்தத்தைக் கைவிடுமாறு இலங்கை நீதித்துறைச் சேவைச் சங்கம் (JSASL) அரசாங்கத்தை வலியுறுத்தியுள்ளது.
இத்தகைய நடவடிக்கை நீதித்துறையின் சுதந்திரத்தையும் ஸ்திரத்தன்மையையும் பாதிக்கக்கூடும் என்றும் அது எச்சரித்துள்ளது.
இது தொடர்பில் நீதித்துறை அமைச்சர் ஹர்ஷன நானயக்காரவுக்கு அனுப்பிய கடிதத்தில், உயர் நீதிமன்றம் மற்றும் மேல்முறையீட்டு நீதிமன்ற நீதிபதிகளின் ஓய்வுபெறும் வயதை நீட்டிப்பது நீதித்துறையில் தொலைநோக்கு விளைவுகளை ஏற்படுத்துவதுடன், நீதி நிர்வாகத்தின் மீதான பொதுமக்களின் நம்பிக்கையையும் சிதைக்கும் என்று அந்தச் சங்கம் தெரிவித்துள்ளது.
இலங்கையின் இரண்டு உயர் நீதிமன்றங்களில் பணியாற்றும் நீதிபதிகளின் ஓய்வுபெறும் வயதை உயர்த்துவதற்காக அரசியலமைப்பில் திருத்தம் மேற்கொள்ளும் வகையிலான முன்மொழிவு ஒன்றை, அரசாங்கம் விரைவில் அமைச்சரவையில் சமர்ப்பிக்கும் என எதிர்பார்க்கப்படுகிறது.
இலங்கை சட்டத்தரணிகள் சங்கம் உள்ளிட்ட பல்வேறு தரப்பினரிடமிருந்து இத்திட்ட முன்மொழிவு ஏற்கனவே விமர்சனங்களை எதிர்கொண்டுள்ளது.
மாவட்ட நீதிபதிகள் மற்றும் நீதிவான்களைப் பிரதிநிதித்துவப்படுத்தும் நீதிச் சேவைச் சங்கம், ஜூலை 11 அன்று நடைபெற்ற தனது பொதுச் சபைக் கூட்டத்தில் இத்திட்ட முன்மொழிவை அதிகாரப்பூர்வமாக எதிர்த்தது.
அத்துடன், தனது நிலைப்பாட்டை ஜனாதிபதி அநுர குமார திஸாநாயக்கவுக்கு எழுத்துப்பூர்வமாகத் தெரியப்படுத்தவும் அச்சங்கம் தீர்மானித்தது.
நீதித்துறை அமைச்சருக்கு அனுப்பிய கடிதத்தில், ஓய்வுபெறும் வயதை நீட்டிப்பது நீதித்துறையிலான பதவி உயர்வுகளை ஏறக்குறைய இரண்டு ஆண்டுகளுக்கு முடக்கிவிடும் என்றும், இதனால் அக்காலகட்டத்தில் நீதித்துறை அதிகாரிகள் உயர் நீதிமன்றங்களுக்கும் மூத்த நீதித்துறைப் பதவிகளுக்கும் முன்னேறிச் செல்வது தடுக்கப்படும் என்றும் அந்தச் சங்கம் வாதிட்டது.
மேலும், உயர் நீதிமன்றத்திற்கான பதவி உயர்வுகள் கூடுதலாக இரண்டு ஆண்டுகள் தாமதமாகும் என்றும், இது தற்போதுள்ள பணி முன்னேற்ற முறையைச் சீர்குலைத்து, நீதித்துறை நியமனங்களில் சமநிலையின்மையை உருவாக்கும் என்றும் அது எச்சரித்தது.
தொழில்முறை நீதிபதிகள் தங்கள் பணிநிலையில் முன்னேறுவதற்கான வாய்ப்புகளைக் குறைப்பதன் மூலம், இத்திட்டம் தொழில்முறை நீதித்துறையின் கட்டமைப்பை வலுவிழக்கச் செய்யும் என்று அந்தச் சங்கம் கருதுகிறது.
மேலும், இந்தத் திருத்தமானது தற்போது பணியாற்றும் நீதிபதிகளின் மன உறுதியையும் தொழில்முறை ஊக்கத்தையும் எதிர்மறையாகப் பாதிக்கும் என்றும், திறமையான இளம் சட்டத்தரணிகளுக்கு நீதித்துறை சேவையை ஒரு கவர்ச்சியற்ற தேர்வாக மாற்றி, அவர்களை நீதித்துறைக்கு வெளியே உள்ள தொழில் பாதைகளைத் தேர்ந்தெடுக்கத் தூண்டும் என்றும் அச்சம் தெரிவிக்கப்பட்டது.
நீதித்துறையின் சுதந்திரத்தைப் பாதுகாக்கவும், இலங்கையின் நீதித்துறை மீதான பொதுமக்களின் நம்பிக்கையையும் மதிப்பையும் தக்கவைக்கவும் இத்திட்டத்தைக் கைவிடுவது உதவும் என்று வாதிட்ட நீதித்துறைச் சேவைச் சங்கம், முன்மொழியப்பட்ட அரசியலமைப்புத் திருத்தம் குறித்து மறுபரிசீலனை செய்யுமாறு அரசாங்கத்தை வலியுறுத்தியது.
