தமிழகத்தின் காரைக்காலை சார்ந்த மீனவர்கள் மீது இலங்கை கடற்படையினர் மேற்கொண்ட கொடூர தாக்குதலினால், ஐந்து பேர் படுகாயமடைந்த நிலையில் ஒருவர் தஞ்சை அரசு மருத்துவமனையில் மேலதிக சிகிச்சைக்காக சேர்க்கப்பட்டுள்ளார்.
காரைக்கால் மாவட்டம் காரைக்கால் மேடு பகுதியைச் சேர்ந்தவர் ராஜ்குமார் என்பவருக்கு சொந்தமான விசைப்படையில் கடந்த இரண்டாம் திகதி இரவு காரைக்கால் துறைமுகத்தில் இருந்து 15 பேர் மீன் பிடிக்க கடலுக்குள் சென்றனர்.
கோடியக்கரைக்கு தென்கிழக்கு இந்திய எல்லைக்குள் அவர்கள் மீன்பிடித்துக் கொண்டிருக்கும் போது அங்கு அத்துமீறி நுழைந்த இலங்கை கடற்படையினர், மீன்பிடித்துக் கொண்டிருந்த ராஜ்குமார் படகை சுற்றி வளைத்து கடுமையாக தாக்கியுள்ளதாகத் தெரிவிக்கப்பட்டுள்ளது.
மேலும் விசைப்படகில் இருந்த திசைகாட்டும் கருவி, வாக்கி டாக்கி மற்றும் ஜிபிஎஸ் கருவி உள்ளிட்ட உபகரணங்களை சேதப்படுத்தியுள்ளனர் என்று கூறப்பட்டுள்ளது.
படகில் இருந்தவர்கள் மீது கொடூர தாக்குதல் நடத்தியதில் ராஜ்குமார் தண்டபாணி, மதன், அருண்குமார் மாணிக்கவேல் சூர்யா ஆகிய ஆறு பேர் பலத்த காயமடைந்தனர்.
இன்று கரை திரும்பிய இவர்கள் காரைக்காலில் மருத்துவமனையில் சிகிச்சைக்காக அனுமதிக்கப்பட்டுள்ளனர்.
இவர்களில் படகின் உரிமையாளர் ராஜ்குமாருக்கு பலத்த காயமடைந்த நிலையில், மேலதிக சிகிச்சைக்காக தஞ்சைக்கு கொண்டு செல்லப்பட்டுள்ளார் என இந்தியச் செய்திகள் தெரிவித்துள்ளன.
சம்பவம் தொடர்பாக காரைக்கால் மீன்வளத்துறை மற்றும் மாவட்ட ஆட்சியரிடம் பாதிக்கப்பட்ட மீனவர்களின் உறவினர்கள் முறைப்பாடளித்துள்ளனர்.
இச்சம்பவம் காரைக்கால் பகுதி மீனவர்கள் இடையே கடும் பதற்றத்தை ஏற்படுத்தியுள்ளதாக தமிழக செய்திகள் தெரிவிக்கின்றன.
