காசாவில் போரை முடிவுக்குக் கொண்டுவருவதற்கான ஜனாதிபதி டொனால்ட் ட்ரம்பின் திட்டத்தை ஆதரித்து, பாலஸ்தீனப் பகுதிக்கு ஒரு சர்வதேச நிலைப்படுத்தல் படையை அங்கீகரிப்பதற்கான அமெரிக்காவால் வரைவு செய்யப்பட்ட தீர்மானத்தை ஐ.நா. பாதுகாப்பு சபை திங்களன்று (17) நிறைவேற்றியது.
இந்தத் தீர்மானத்திற்கு இங்கிலாந்து, பிரான்ஸ் மற்றும் சோமாலியா உட்பட 13 நாடுகள் ஆதரவு தெரிவித்தன.
யாரும் இந்த முன்மொழிவுக்கு எதிராக வாக்களிக்கவில்லை.
ரஷ்யாவும் சீனாவும் வாக்களிக்கவில்லை.
அமெரிக்காவின் தீர்மானத்தை ஏற்றுக்கொள்வது “போர் நிறுத்தத்தை வலுப்படுத்துவதில் ஒரு முக்கியமான படியாகும்” என்று ஐ.நா. பொதுச்செயலாளர் அன்டோனியோ குட்டெரெஸின் செய்தித் தொடர்பாளர் கூறினார்.
எனினும், பாலஸ்தீனியர்களின் உரிமைகள் மற்றும் கோரிக்கைகளை நிறைவேற்றத் தவறிவிட்டதாகக் கூறி, ஹமாஸ் இந்தத் தீர்மானத்தை நிராகரித்துள்ளது.
தீர்மானம் நிறைவேற்றப்பட்ட பின்னர் டெலிகிராமில் பதிவிட்ட ஹமாஸ்,
இந்த திட்டம், “காசா பகுதியில் ஒரு சர்வதேச பாதுகாப்பு பொறிமுறையை திணிக்கிறது, இதை நமது மக்களும் அவர்களது பிரிவுகளும் நிராகரிக்கின்றன” என்று கூறியது.
இந்தத் தீர்மானத்தின் கீழ், எல்லைப் பகுதிகளைப் பாதுகாக்கவும், ஹமாஸ் உள்ளிட்ட அரசு சாரா ஆயுதக் குழுக்களை நிரந்தரமாக நிராயுதபாணியாக்கும் செயல்முறையை உறுதி செய்யவும், புதிதாகப் பயிற்சி பெற்ற மற்றும் சரிபார்க்கப்பட்ட பாலஸ்தீனிய காவல்துறையுடன் இணைந்து இஸ்ரேல் மற்றும் எகிப்துடன் சர்வதேச நிலைப்படுத்தல் படை இணைந்து செயல்படும்.
இதுவரை, அங்குள்ள காவல்துறை ஹமாஸின் அதிகாரத்தின் கீழ் செயல்பட்டு வருகிறது.
மேலும், பாலஸ்தீனிய தொழில்நுட்ப, அரசியல் சார்பற்ற குழுவின் நிர்வாகத்தை மேற்பார்வையிடும், காசாவின் மீள்கட்டமைப்பு மற்றும் மனிதாபிமான உதவிகளை வழங்குவதை மேற்பார்வையிடும் அமைதி வாரியம் (BoP) எனப்படும் ஒரு இடைக்கால நிர்வாக அமைப்பை உருவாக்குவதற்கும் பாதுகாப்பு சபை ஒப்புதல் அளித்தது.
இரண்டு வருடப் போருக்குப் பிறகு காசாவை மீண்டும் கட்டியெழுப்புவதற்கான நிதியுதவி உலக வங்கியின் ஆதரவுடன் கூடிய அறக்கட்டளை நிதியிலிருந்து வரும் என்று தீர்மானத்தில் தெரிவிக்கப்பட்டுள்ளது.
