கொங்கோ ஜனநாயகக் குடியரசில் பரவியுள்ள எபோலா நோயால் குறைந்தது 118 பேர் உயிரிழந்துள்ளதாகவும், 390-க்கும் மேற்பட்டோர் பாதிக்கப்பட்டிருக்கலாம் என சந்தேகிக்கப்படுவதாகவும் உள்ளூர் அதிகாரிகள் தெரிவித்துள்ளனர்.
இறப்பு எண்ணிக்கையைப் புதுப்பித்ததோடு மட்டுமல்லாமல், தற்போது பரந்த பகுதியில் நோய்த்தொற்றுகள் பதிவாகி வருவதாகவும் கொங்கோ குடியரசு அரசாங்கத்தின் செய்தித் தொடர்பாளர் தெரிவித்தார்.
உகாண்டாவில் இரண்டு பேருக்கு நோய்த்தொற்று உறுதிசெய்யப்பட்டு, ஒருவர் உயிரிழந்துள்ளார் என அமெரிக்க நோய் கட்டுப்பாடு மற்றும் தடுப்பு மையம் (CDC) தெரிவித்துள்ளது.
புண்டிபுக்யோ வைரஸால் ஏற்படும் எபோலாவின் தற்போதைய திரிபு பரவலை, உலக சுகாதார அமைப்பு (WHO) ஒரு சர்வதேச அவசரநிலையாக அறிவித்துள்ளது.
இந்தக் கொடிய எபோலா நோய் பரவல் தொடர்ந்து பரவி வருவதால், சந்தேகிக்கப்படும் நோய்த்தொற்றுகளைக் கண்டறிந்து விசாரிப்பதில் தங்களது மீட்புக் குழுக்கள் கடுமையாக உழைத்து வருவதாகவும், பீதியடையத் தேவையில்லை என்றும் கொங்கோ அரசாங்கம் மக்களுக்கு உறுதியளித்துள்ளது.
இருப்பினும், இட்டூரி மாகாணத்தில் உள்ள நியாகுண்டே, வடக்கு கிவுவில் உள்ள புடெம்போ மற்றும் கோமா நகரம் உள்ளிட்ட புதிய பகுதிகளில் தற்போது நோய்த்தொற்றுகள் கண்டறியப்பட்டுள்ளதால், கவலை தவிர்க்க முடியாமல் அதிகரித்து வருகிறது.
