நீதிபதிகளின் ஓய்வுபெறும் வயதை உயர்த்துவதற்கான முன்மொழிவு மற்றும் அதற்குப் பதிலளிக்கும் வகையில் மேற்கொள்ளப்பட வேண்டிய நடவடிக்கைகள் குறித்து விவாதிக்க, இலங்கை சட்டத்தரணிகள் சங்கம் (BASL) இன்று (29) ஒரு சிறப்புப் பொதுக் கூட்டத்தை நடத்தவுள்ளது.
நீதிபதிகளுக்கான ஓய்வுபெறும் வயது வரம்பை மாற்றியமைக்க அரசாங்கம் எடுத்துள்ள நடவடிக்கை தொடர்பாக, சங்கம் மேற்கொள்ள வேண்டிய சாத்தியமான நடவடிக்கைகள் குறித்து இந்தக் கூட்டம் கவனம் செலுத்தும் என்று BASL தலைவரும் சட்டத்தரணியுமான ராஜீவ் அமரசூரிய தெரிவித்தார்.
இக்கூட்டம் இன்று காலை 11.00 மணிக்குக் கொழும்பில் உள்ள BASL வளாகத்தில் நடைபெறவுள்ளது.
இவ்விவகாரம் எந்தவொரு தனிநபரையோ அல்லது நீதிபதியையோ சார்ந்தது அல்ல என்றும், மாறாக இது நீதித்துறையின் சுதந்திரம், அரசியலமைப்பு நெறிமுறைகள் மற்றும் நீதித்துறையின் மீதான பொதுமக்களின் நம்பிக்கையைப் பாதுகாத்தல் ஆகியவற்றுடன் தொடர்புடையது என்றும் ராஜீவ் அமரசூரிய கூறினார்.
அரசியலமைப்பில் மேற்கொள்ளப்படும் எந்தவொரு அடிப்படை மாற்றமும், பரந்த அளவிலான பொதுமக்களின் மற்றும் சம்பந்தப்பட்ட தரப்பினரின் ஆலோசனைகளை உள்ளடக்கிய வெளிப்படையான செயல்முறையின் மூலமே கொண்டுவரப்பட வேண்டும் என்று அவர் மேலும் குறிப்பிட்டார்.
தேசிய முக்கியத்துவம் வாய்ந்த விவகாரமாகக் கருதப்படும் இது குறித்து விவாதிப்பதற்காக நடைபெறும் சிறப்புக் பொதுக் கூட்டத்தில் பங்கேற்குமாறு இலங்கை சட்டத்தரணிகள் சங்க உறுப்பினர்களுக்கு அழைப்பு விடுக்கப்பட்டுள்ளது.
