கிளிநொச்சி அறிவியல் நகர்ப் பகுதியில் உள்ள விடியல் ஆடைத் தொழிற்சாலையின் முன்பாக மூன்று சிறுவர்களுடன் தந்தையொருவர் உணவுத் தவிர்ப்புப் போராட்டத்தில் ஈடுபட்டார்.
குறித்த ஆடைத் தொழிற்சாலையில் நேற்று (வியாழக்கிழமை) மேற்கொள்ளப்பட்ட அன்ரிஜென் பரிசோதனையில் 24 பேருக்குக் கொரோனா வைரஸ் தொற்று கண்டறியப்பட்டிருந்தது.
இந்நிலையில், தொற்றாளர்களில் ஒரு பெண்ணின் பிள்ளைகளும் கணவனுமே இவ்வாறு போராட்டத்தை முன்னெடுத்தனர்.
இதுதொடர்பான குறித்த கணவர் தெரிவிக்கையில், “கிளிநொச்சி, அக்கராயன் – மணியங்குளத்தைச் சேர்ந்த என்னுடைய மனைவிக்கு கொரோனா வைரஸ் தொற்று ஏற்பட்டுள்ளதாகச் சொல்லப்படுகின்றது.
எனினும், எனக்கு குறித்த தகவல் அறிவிக்கப்படவில்லை. குழந்தைகளை வைத்துக்கொண்டு நாம் பல்வேறு நெருக்கடிகளைச் சந்திக்கிறோம்.
எம்மை சுகாதார நடைமுறைகளுக்கு உட்படுத்தவும் நடவடிக்கை எடுக்கவில்லை.
அத்துடன், கடந்த சில நாட்களுக்கு முன்னரே தற்போதுள்ள சூழலில் தொழிலுக்குச் செல்லவேண்டாம் என நான் மறித்த நிலையில், தொழிற்சாலை ஊழியர்களால் நம்பிக்கையூட்டப்பட்டு மனைவி பணிக்கு அமர்த்தப்பட்டார்” என கணவர் தெரிவித்துள்ளார்.
இந்நிலையில், குறித்த குடும்பத்தாருடன் ஆடைத் தொழிற்சாலை நிர்வாகத்தினர் நீண்ட நேரம் பேச்சுவார்த்தையில் ஈடுபட்டதுடன், குறித்த கணவன், மனைவியுடன் தொலைபேசியில் உரையாடியதன் பின்னர் போராட்டம் முடிவுக்கு வந்தது.
இதன்போது, குறித்த பெண் குணமடைந்து வீடு திரும்பும்வரை அந்தக் குடும்பத்திற்கான உதவிகளை வழங்குவதாக தொழிற்சாலை நிர்வாகம் உறுதியளித்துள்ளது.
இதேவேளை, புதுக்குடியிருப்பு ஆடைத் தொழிற்சாலையில் ஒரேநாளில் 261 பேருக்குக் கொரோனா வைரஸ் தொற்று கண்டறியப்பட்டபோது, ஆடைத் தொழிற்சாலைகளை மூடுமாறு பலதரப்புக்களால் கோரப்பட்டபோதும் இதுவரை ஆடைத் தொழிற்சாலைகளை மூட நடவடிக்கைகள் எடுக்கப்படவில்லை.
இவ்வாறான சூழலில் பல குடும்பங்கள் பல்வேறு சிரமங்களை எதிர்கொண்டு வருகின்றமை குறித்து இனியாவது உரிய தரப்புக்கள் செவிசாய்க்க வேண்டுமென சமூக ஆர்வலர்கள் வலியுறுத்துகின்றனர்.
