கடந்த 2022ஆம் ஆண்டு ஜனவரியில் இருந்து அமெரிக்கா தனது வான்வெளியில் 10 முறைக்கு மேல் சட்டவிரோதமாக அதிக உயரத்தில் பலூன்களை பறக்கவிட்டதாக சீனா குற்றம் சாட்டியுள்ளது.
அமெரிக்கப் போர் விமானங்களால் சுட்டு வீழ்த்தப்பட்ட சீன பலூனினால் ஏற்பட்ட பதற்றங்களுக்கு மத்தியில் இந்த தகவல் வந்துள்ளது.
வழக்கமான ஊடக சந்திப்பில் கருத்து தெரிவித்த போதே, சீன வெளியுறவு அமைச்சக செய்தித் தொடர்பாளர் வாங் வென்பின் இந்த கருத்தினை வெளியிட்டார்.
இதன்போது அவர் மேலும் கூறுகையில், ‘அமெரிக்க பலூன்கள் மற்ற நாடுகளின் வான்வெளியில் சட்டவிரோதமாக நுழைவது பொதுவானது. கடந்த ஆண்டு முதல், அமெரிக்க உயரமான பலூன்கள், தொடர்புடைய சீன அதிகாரிகளின் அனுமதியின்றி, 10 முறைக்கு மேல் சீனாவின் வான்வெளியை சட்டவிரோதமாக கடந்துள்ளன.
சீனாவுக்கு எதிராக நெருங்கிய உளவுப் பணிகளை மேற்கொள்ள அமெரிக்கா அடிக்கடி போர்க்கப்பல்களையும் விமானங்களையும் அனுப்பி வருகின்றது. இது கடந்த ஆண்டு மொத்தம் 657 முறை மற்றும் இந்த ஜனவரியில் இருந்து இதுவரையான காலப்பகுதியில் தென் சீனக் கடலில் 64 முறை கடந்துள்ளது.
நீண்ட காலமாக, அமெரிக்கா தனது சொந்த தொழில்நுட்ப நன்மைகளை துஷ்பிரயோகம் செய்து பெரிய அளவிலான மற்றும் கண்மூடித்தனமான வயர்டேப்பிங் மற்றும் அதன் நட்பு நாடுகள் உட்பட உலகம் முழுவதிலுமிருந்து இரகசியங்களை திருடுகிறது’ என கூறினார்.
சீனா தனது கிழக்கு கடற்கரைக்கு அருகில் பறக்கும் அடையாளம் தெரியாத ஒரு பொருளை சுட்டு வீழ்த்துவதற்கு தயாராகி வருவதாக சீனா கூறிய ஒரு நாளுக்குள் இந்த செய்தி வந்துள்ளது.
இதற்கிடையில், சீனாவின் ஷான்டாங் மாகாணத்தில் உள்ள கடல்சார் அதிகாரிகள் ஞாயிற்றுக்கிழமை ரிசாவோ துறைமுக நகருக்கு அருகிலுள்ள நீரில் அடையாளம் தெரியாத பறக்கும் பொருளை கண்டதாகவும், அதை சுட்டு வீழ்த்துவதற்கு தயாராகி வருவதாகவும் அரசு நடத்தும் செய்தி நிறுவனமான தி பேப்பர் தெரிவித்துள்ளது.
அது என்ன வகையான பொருள், எங்கிருந்து வந்திருக்கலாம் அல்லது எந்த உயரத்தில் பறந்து கொண்டிருந்தது என்பதை அறிக்கை குறிப்பிடவில்லை.
உள்ளூர் நேரப்படி திங்கட்கிழமை பிற்பகல் வரை, சீன அதிகாரிகள் மற்றும் அரசு ஊடகங்கள் எந்தப் புதுப்பிப்புகளையும் வழங்கவில்லை, மேலும் பொருள் ஏற்கனவே அகற்றப்பட்டதா என்பது தெளிவாகத் தெரியவில்லை.
