அறிவுசார் சொத்துரிமைகளைப் பாதுகாப்பதற்கான நடவடிக்கைகளின் ஒரு பகுதியாக, திருமணம், விருந்து, ஹோட்டல், வங்கி, பல்பொருள் அங்காடி, நிறுவனங்களின் நிகழ்ச்சிகள் மற்றும் பிற நிகழ்வுகளில் குறிப்பிட்ட சில இசை வகைகளை பொதுமக்கள் பயன்பாட்டிற்காக ஒலிபரப்ப உரிமம் பெற வேண்டும் என்பதற்கான புதிய விதிமுறைகள் நடைமுறைக்கு வந்துள்ளன.
இலங்கையின் தேசிய அறிவுசார் சொத்து அலுவலகத்தின் கீழுள்ள இலங்கை படைப்பாளர்கள் மற்றும் வெளியீட்டாளர்கள் சங்கத்தால் (ACPOSL) வர்த்தமானியில் வெளியிடப்பட்ட விதிமுறைகள் கடந்த செவ்வாய்க்கிழமை முதல் நடைமுறைக்கு வந்தன.
புதிய நடைமுறையின் கீழ், விதிமுறைகளுக்கு உட்பட்ட இசை இடம்பெறும் நிகழ்ச்சிகளை நடத்த உரிமம் பெற வேண்டும் என்று ஹோட்டல்கள் மற்றும் பிற நிறுவனங்களுக்குத் தெரிவிக்கப்பட்டுள்ளது.
நிகழ்ச்சியின் வகை மற்றும் பங்கேற்பாளர்களின் எண்ணிக்கையைப் பொறுத்து, இதற்கான கட்டணம் ரூ. 20,000 முதல் ரூ. 1,25,000 வரை அமைகிறது.
உரிமம் பெறுவதற்கான இத்தேவையானது, இலங்கை படைப்பாளர்கள் மற்றும் வெளியீட்டாளர்கள் சங்கத்தால் பிரதிநிதித்துவப்படுத்தப்படும் இலங்கை இசைப் படைப்புகள் மற்றும் இந்தியன் பெர்ஃபார்மிங் ரைட்ஸ் சொசைட்டி (IPRS) மூலம் பிரதிநிதித்துவப்படுத்தப்படும் ஹிந்தி மற்றும் தமிழ் இசைப் படைப்புகள் ஆகியவற்றை உள்ளடக்கியுள்ளது.
ஆங்கிலம் அல்லது பிற வெளிநாட்டு இசையை மட்டுமே கொண்ட நிகழ்ச்சிகளுக்கு உரிமம் பெறத் தேவையில்லை.
திருமணங்கள் மற்றும் வரவேற்பு நிகழ்ச்சிகள், தனிப்பட்ட விருந்துகள், நிறுவனங்களின் நிகழ்ச்சிகள், இரவு நேர நடன நிகழ்ச்சிகள், விருது வழங்கும் விழாக்கள், புதிய தயாரிப்பு அறிமுகங்கள், விளம்பர மற்றும் ஆதரவு பெற்ற நிகழ்ச்சிகள், இசை நிகழ்ச்சிகள் (இசைக்கலைஞர்கள், டிஜே (DJ) மற்றும் நேரடி இசைக்குழுக்களின் பங்கேற்புடன்), இசை கச்சேரிகள் மற்றும் இசை சார்ந்த நிகழ்ச்சிகள் உள்ளிட்ட பல்வேறு வகையான நிகழ்வுகளுக்கும் இக்கட்டுப்பாடுகள் பொருந்தும்.
கட்டண அமைப்பின்படி, 100-க்கும் குறைவான பங்கேற்பாளர்களைக் கொண்ட DJ நிகழ்ச்சிகளுக்கு ரூ. 20,000, 100 முதல் 300 வரையிலான பங்கேற்பாளர்களைக் கொண்ட நிகழ்ச்சிகளுக்கு ரூ. 30,000, 300-க்கும் மேற்பட்ட பங்கேற்பாளர்களைக் கொண்ட நிகழ்ச்சிகளுக்கு ரூ. 40,000கட்டணமாக வசூலிக்கப்படும்.
நேரடி இசை நிகழ்ச்சிகளுக்கான கட்டணங்கள் முறையே ரூ. 25,000, ரூ. 35,000 மற்றும் ரூ. 50,000 ஆகும்.
தனியார் அல்லது நிறுவனங்களின் DJ நிகழ்ச்சிகளுக்கு, 100-க்கும் குறைவான பங்கேற்பாளர்கள் இருந்தால் ரூ. 25,000, 100 முதல் 300 பங்கேற்பாளர்கள் இருந்தால் ரூ. 40,000, 300-க்கும் மேற்பட்ட பங்கேற்பாளர்கள் இருந்தால் ரூ. 50,000 கட்டணமாக வசூலிக்கப்படும்.
நேரடி இசை அல்லது கலப்பு வகை நிகழ்ச்சிகளைக் கொண்ட தனியார் அல்லது நிறுவன அளவிலான நிகழ்வுகளுக்கு, பங்கேற்பாளர்களின் எண்ணிக்கையின் அடிப்படையில் முறையே ரூ. 50,000, ரூ. 75,000 மற்றும் ரூ. 1,25,000 கட்டணம் வசூலிக்கப்படும்.
விதிமுறைகளின்படி, ACPOSL உரிமம் இல்லாமல் நிகழ்ச்சிகளை நடத்த ஹோட்டல்கள் அனுமதிக்கக்கூடாது.
மேலும், நிகழ்ச்சியின் போது இசைக்கப்பட்ட இசையை அடையாளம் காணும் வகையில், நிகழ்ச்சி முடிந்ததும் அதன் ஒலிப்பதிவை ஏற்பாட்டாளர்கள் வழங்க வேண்டும்.
நிகழ்ச்சிக்குக் குறைந்தது 14 நாட்களுக்கு முன்னதாகவே இதற்கான உரிமம் பெறப்பட வேண்டும்.
பெருநிறுவன வாடிக்கையாளர்கள், திருமண ஏற்பாட்டாளர்கள் அல்லது தனிப்பட்ட ஏற்பாட்டாளர்கள் உள்ளிட்ட ஹோட்டல் அல்லது நிகழ்ச்சி ஏற்பாட்டாளரே இந்த உரிமத்தைப் பெறுவதற்கான பொறுப்பை ஏற்க வேண்டும்.
இந்த உரிமத் திட்டம் பல்பொருள் அங்காடிகள், வங்கிகள், சில்லறை விற்பனைக் கடைகள், வணிக வளாகங்கள், திரையரங்குகள், அலுவலகக் கட்டிடங்கள் மற்றும் பேருந்துகள், சொகுசுப் பேருந்துகள், சுற்றுலா வேன்கள் மற்றும் பயணிகள் ரயில்கள் போன்ற போக்குவரத்து வாகனங்களுக்கும் பொருந்தும்.
வணிக வளாகங்களுக்கு ஆண்டுதோறும் உரிமங்கள் வழங்கப்படும்; இதற்கான கட்டணங்கள் பரப்பளவு மற்றும் உள்ளூராட்சி அதிகார வரம்பிற்கு ஏற்ப மாறுபடும்.
