அவுஸ்திரேலியாவின் கிழக்கு நகரமான நியூகாஸில், ரக்பி லீக் விளையாட்டு ரசிகர்கள் கூட்டத்திற்குள் கார் ஒன்று புகுந்து மோதியதில், மூன்று குழந்தைகள் உட்பட 10 பேர் காயமடைந்தனர்.
இந்த சம்பவம் சனிக்கிழமை (03) இடம்பெற்றதாக நியூ சவுத் வேல்ஸ் காவல்துறை தெரிவித்துள்ளது.
வாகனத்தை செலுத்திச் சென்ற 18 வயது இளைஞரைக் கைது செய்துள்ளதாகவும், சம்பவம் குறித்து விசாரணை நடத்தி வருவதாகவும் காவல்துறையினர் தெரிவித்தனர்.
ஆரம்பக்கட்ட விசாரணைகளில் அந்த சந்தேக நபர் இலங்கை வம்சாவளியைச் சேர்ந்தவர் என்று தெரியவந்துள்ளது.
இந்த விபத்து “பயங்கரவாதத்துடன்” தொடர்புடையதாகக் கருதப்படவில்லை என்று நியூ சவுத் வேல்ஸ் காவல்துறையினர் கூறியுள்ளனர்.
எனினும், இந்திகா பாம்ப்ரிக் சமரசிங்க என அடையாளம் காணப்பட்ட சந்தேக நபர் மீது, கடுமையான உடல் காயத்தை ஏற்படுத்தும் அபாயகரமான வாகனம் செலுத்துதல், கடுமையான உடல் காயத்தை ஏற்படுத்தும் கவனக்குறைவான வாகனம் செலுத்துதல் மற்றும் முறையற்ற நடத்தை மூலம் உடல் காயத்தை ஏற்படுத்துதல் ஆகிய மூன்று குற்றச்சாட்டுகள் உட்பட பல குற்றச்சாட்டுகள் சுமத்தப்பட்டுள்ளன.
சந்தேக நபரது சாரதி அனுமதிப் பத்திரம் கடந்த பெப்ரவரியில் இடைநீக்கம் செய்யப்பட்டதாக நீதிமன்ற ஆவணங்கள் வெளிப்படுத்தியதாக News.com.au செய்தி வெளியிட்டுள்ளது.
அவர் ஏப்ரல் மாதம் அந்த இடைநீக்கத்திற்கு எதிராக மேல்முறையீடு செய்திருந்தார், ஆனால் அது தோல்வியடைந்தமையும் குறிப்பிடத்தக்கது.
