முன்மொழியப்பட்டுள்ள ‘பயங்கரவாதத்திலிருந்து அரசைப் பாதுகாப்பதற்கான சட்டத்தை’ (PSTA) இலங்கை அரசாங்கம் திருத்த வேண்டும் என்றும், இந்த சட்டமூலம் சர்வதேச மனித உரிமைகள் சட்டத்திற்கு இணங்குவதை அவர்கள் உறுதி செய்ய வேண்டும் என்றும் ஐக்கிய நாடுகள் (UN) சபையின் நிபுணர்கள் திங்களன்று (09) தெரிவித்தனர்.
அதேநேரம், இலங்கையில் 26 ஆண்டுகள் நீடித்த கொடூரமான உள்நாட்டுப் போருக்கு முன்னரும், போரின் போதும், பின்னரும், சிறுபான்மையினர், மனித உரிமைப் பாதுகாவலர்கள், பத்திரிகையாளர்கள் மற்றும் சிவில் சமூகம் ஆகியோருக்கு எதிரான துஷ்பிரயோகங்கள் உட்பட, சித்திரவதை மற்றும் கட்டாயக் காணாமலாக்கல் போன்ற பல கடுமையான மனித உரிமை மீறல்களுக்கு வழிவகுத்த 1979 ஆம் ஆண்டின் பயங்கரவாதத் தடுப்புச் சட்டத்தை இரத்து செய்ய முன்மொழியப்பட்டுள்ளதை நாங்கள் வரவேற்கிறோம் என்றும் ஐ.நா. நிபுணர்கள் குறிப்பிட்டனர்.
இலங்கை அரசாங்கம் கருத்துகளுக்குப் பதிலளிக்கும் வகையில், PSTA-வின் மிகவும் மேம்படுத்தப்பட்ட புதிய வரைவைச் சமர்ப்பித்துள்ளதாக அவர்கள் குறிப்பிட்டனர்.
அதேவேளையில், முக்கியமான சில கவலைகளுக்கு இன்னும் தீர்வு காணப்பட வேண்டியுள்ளது என்பதையும் அவர்கள் வலியுறுத்தினர்.
தடுப்புக்காவல் மற்றும் விடுதலை உத்தரவின் சட்டபூர்வத்தன்மை, அவசியம் மற்றும் விகிதாச்சாரம் ஆகியவற்றைச் சோதிப்பது உட்பட, தடுப்புக்காவல் உத்தரவுகள் உடனடியான மற்றும் திறமையான நீதித்துறை கட்டுப்பாடு மற்றும் மேற்பார்வைக்கு உட்பட்டதாக இருக்க வேண்டும் என்று நிபுணர்கள் கூறினர்.
தடுப்புக்காவல் தொடர்பான மேல்முறையீடுகளை விசாரிக்கும் சுதந்திரமான மீளாய்வுக் குழு, உண்மையாகவே சுதந்திரமானதாக இருக்க வேண்டும்; அதன் முடிவுகள் கட்டுப்படுத்தும் தன்மை கொண்டவையாக இருக்க வேண்டும் என்று அவர்கள் கூறினர்.
தடுத்துவைக்கப்பட்டவர்களுக்கு சட்ட ஆலோசனை, மொழிபெயர்ப்பு, சுதந்திரமான மருத்துவப் பரிசோதனை, சட்ட உதவி, குடும்பத்தினருடனான தொடர்பு மற்றும் இலங்கை மனித உரிமைகள் ஆணைக்குழுவின் உடனடி சந்திப்புகள் ஆகியவை உறுதி செய்யப்பட வேண்டும் என்று நிபுணர்கள் தெரிவித்தனர்.
கட்டாயமாகக் காணாமல் போவதையும், வெளி உலகத் தொடர்பின்றி தடுத்து வைப்பதையும் தடுப்பதற்காக, தடுப்புக்காவலில் இருந்து அவர்கள் மாற்றப்படுவது பதிவு செய்யப்பட்டு அறிவிக்கப்பட வேண்டும் என்றும் அவர்கள் சுட்டிக்காட்டினர்.
பயங்கரவாதம் என்பதற்கான வரையறையை, உயிரிழப்பையோ அல்லது கடுமையான காயங்களையோ வேண்டுமென்றே ஏற்படுத்தும் செயல்களுக்கு மட்டுமே எனச் சுருக்க வேண்டும் என்றும், வெறும் சொத்துச் சேதங்களை இதில் சேர்க்கக்கூடாது என்றும் அவர்கள் வலியுறுத்தினர்.
அத்துடன், கருத்து வெளிப்பாட்டுடன் தொடர்புடைய குற்றங்கள், பயங்கரவாத வன்முறையை ஏற்படுத்துவதற்கான சாத்தியக்கூறைக் கொண்டிருக்க வேண்டும் என்றும் நிபுணர்கள் தெரிவித்தனர்.
இராணுவ மீறல்களின் வரலாற்றைக் கருத்தில் கொண்டு, தவறான பயன்பாட்டைத் தடுப்பதற்காக ஆயுதப் படைகளின் கைது, விசாரணை மற்றும் சோதனை அதிகாரங்களை ஒழிக்க வேண்டும் என்று நிபுணர்கள் அழைப்பு விடுத்தனர்.
மேலும், பயங்கரவாதக் குற்றங்களைத் தடுப்பதற்கான அதிகாரங்கள் கடுமையாக்கப்பட்டு, நீதித்துறை மேற்பார்வையின் கீழ் கொண்டுவரப்பட வேண்டும் என்றும் அவர்கள் எச்சரித்தனர்.
அமைப்புகளைத் தடை செய்வதற்கான அளவுகோல்களும் வரம்புகளும் தெளிவுபடுத்தப்பட்டு உயர்த்தப்பட வேண்டும்; தடைகளுக்குக் கால வரம்புகள் விதிக்கப்பட வேண்டும்; கட்டுப்பாட்டு உத்தரவுகள் மற்றும் இடங்களைத் தடை செய்யும் அதிகாரத்திற்கு ஒட்டுமொத்த கால வரம்புகள் விதிக்கப்பட வேண்டும் என்றும் அவர்கள் வலியுறுத்தினர்.
அத்துடன், நிபுணர்கள் வலுவான நடைமுறைப் பாதுகாப்புகளைக் கோரினர்.
குறிப்பாக சட்டவிரோதமான முறையிலோ, சித்திரவதை அல்லது தவறான நடத்தையின் மூலமோ பெறப்பட்ட அனைத்து ஆதாரங்களும் வாக்குமூலங்களும் சட்ட நடவடிக்கைகளிலிருந்து நீக்கப்பட வேண்டும்.
பாதுகாப்பு காரணங்களுக்காக ஆதாரங்களை வெளிப்படுத்தாதது தொடர்பான சட்ட நடைமுறைகள் பலப்படுத்தப்பட வேண்டும். ஊடகவியலாளர்களின் தகவல் மூலங்கள், சட்ட ரீதியான உரிமைகள், தொழில்முறை ரகசியத்தன்மை மற்றும் மனித உரிமைகள் கண்காணிப்பு தொடர்பான தகவல்கள் வெளிப்படுத்தப்படாமல் பாதுகாக்கப்பட வேண்டும் என்று குறிப்பிட்டனர்.
சட்டத்தை எவ்வாறு நடைமுறைப்படுத்துவது என்பது குறித்து உத்தரவிடும் ஜனாதிபதியின் அதிகாரம் வரையறுக்கப்பட வேண்டும்; மேலும், PSTA நடைமுறைக்கு வந்த பின்னர், அது இடைக்கால ஏற்பாடாகப் பயன்படுத்தப்படக் கூடாது.
PSTA-ன் கீழ் மனித உரிமைகள் மீறப்படும்போதும் அல்லது சட்ட அதிகாரம் மீறப்படும்போதும், அரசாங்கம் கண்காணிப்பையும் பொறுப்புக்கூறலையும் பலப்படுத்த வேண்டும்.
அத்துடன் உடனடியான மற்றும் பயனுள்ள தீர்வுகளை உறுதி செய்ய வேண்டும்.
இதில், தடுப்புக்காவலில் உள்ளவர்களை விடுவித்தல், ஆதாரங்களை நிராகரித்தல், சம்பந்தப்பட்ட அதிகாரிகள் மீது ஒழுங்கு நடவடிக்கை அல்லது குற்றவியல் நடவடிக்கை எடுத்தல், மற்றும் பாதிக்கப்பட்டவர்களுக்கு இழப்பீடு, மறுவாழ்வு, மன்னிப்பு கோருதல் மற்றும் இத்தகைய மீறல்கள் மீண்டும் நிகழாது என்பதற்கான உத்தரவாதம் அளித்தல் போன்ற நிவாரணங்களை வழங்குதல் ஆகியவை அடங்கும் என்று நிபுணர்கள் தெரிவித்தனர்.
தவறான செயல்களுக்காக அதிகாரிகளுக்கு PSTA சட்டம் விலக்கு அளிப்பது ஏற்றுக்கொள்ள முடியாதது என்று அவர்கள் கூறினர்.
மனித உரிமைகள் மதிக்கப்பட்டால் மட்டுமே பயங்கரவாதத்தை எதிர்ப்பது பயனுள்ளதாக இருக்கும்.
PSTA சட்டத்தின் முந்தைய வரைவு குறித்த கவலைகளை நிபுணர்கள் அரசாங்கத்திடம் எடுத்துரைத்தனர், மேலும் குடிமைச் சமூகம் உள்ளிட்ட சம்பந்தப்பட்ட தரப்பினருடன் கலந்தாலோசனை நடத்தவும் அழைப்பு விடுத்தனர்.
அரசு சாரா நிறுவனங்களை ஒழுங்குபடுத்தும் சட்டமூலமங்கள் மற்றும் ஒழுங்கமைக்கப்பட்ட குற்றங்கள் தொடர்பான சட்டமூலங்கள் உள்ளிட்ட தொடர்புடைய சீர்திருத்தங்கள் குறித்தும் அவர்கள் அண்மையில் எடுத்துரைத்தனர்.
சட்டமூலத்தை மேம்படுத்துவதற்காக அதிகாரிகளுக்கு தொழில்நுட்ப உதவியை நிபுணர்கள் வழங்கியமையும் குறிப்பிடத்தக்கது.
