காலையில் காபி குடித்ததும் புத்துணர்ச்சியுடனும் சுறுசுறுப்புடனும் இருப்பதாக உணர்ந்தாலும், காபியில் உள்ள காஃபின் உடலில் புதிதாக ஆற்றலை உருவாக்குவதில்லை எனத் தெரிவிக்கப்படுகிறது.
காஃபின் நரம்பு மண்டலத்தைத் தூண்டும் ஒரு பொருளாகச் செயல்படுவதுடன், மூளையில் சோர்வை உணரச் செய்யும் அடினோசின் என்ற வேதிப்பொருளின் செயல்பாட்டைத் தற்காலிகமாகத் தடுக்கிறது.
இதன் காரணமாக, காபி பருகிய பின்னர் அதிக விழிப்புணர்வுடனும் கவனத்துடனும் செயல்படுவதாக உணர முடியும். மேலும், மகிழ்ச்சி மற்றும் ஊக்கத்துடன் தொடர்புடைய டோபமைன், நார்ட்ரீனலின் போன்ற வேதிப்பொருட்களின் செயல்பாட்டையும் காஃபின் தூண்டுகிறது.
காபியில் உள்ள காஃபின் கவனிக்கும் திறனையும் செயல்திறனையும் மேம்படுத்தக்கூடும் என ஆய்வுகள் தெரிவிக்கின்றன.
எனினும், மாலை அல்லது இரவு நேரங்களில் காபி பருகுவது அதிலுள்ள காஃபின் காரணமாகத் தூக்கத்திற்கு இடையூறாக அமையலாம்.
எனவே, காபியைப் புத்துணர்ச்சி தரும் பானமாக மட்டும் கருதாமல், சரியான நேரத்தில் அளவோடு பருகுவது சிறந்தது எனவும், தூங்குவதற்கு குறைந்தது ஆறு மணி நேரத்திற்கு முன்பே காபி பருகுவதைத் தவிர்ப்பது நல்லது எனவும் அறிவுறுத்தப்படுகிறது.
