அம்பாறை மாவட்டத்தின் பெரும்பாலான பகுதிகளில் கைது செய்யப்பட்டுள்ள முன்னாள் அமைச்சரும் நாடாளுமன்ற உறுப்பினருமான ரிஷாட் பதியுதீனை விடுதலை செய்யுமாறு வலியுறுத்தி சுவரொட்டிகள் ஒட்டப்பட்டுள்ளன.
குறித்த சுவரொட்டியில் ரிஷாட் பதியுதீனுக்கு, விரைவாக விடுதலை கிடைக்க ஆவணம் செய்யுமாறு கோரிக்கை விடுக்கப்பட்டுள்ளது.
அம்பாறை மாவட்டத்திலுள்ள மருதமுனை, இஸ்லாமபாத், நற்பிட்டிமுனை, கல்முனைகுடி, அட்டாளைச்சேனை, அக்கரைப்பற்று, சம்மாந்துறை, மாவடிப்பள்ளி, சாய்ந்தமருது, மாளிகைக்காடு, நிந்தவூர், சவளக்கடை, மத்தியமுகாம், பொத்துவில் ஆகிய பகுதிகளிலுள்ள பிரதான வீதிகள் மற்றும் உள்ளக வீதிகளிலேயே குறித்த சுவரொட்டிகள் காட்சிப்படுத்தப்பட்டுள்ளன.
கடந்த புனித ரமழான் மாதத்தில் நாடாளுமன்ற உறுப்பினர் ரிஷாட் பதியுதீன், சபாநாயகரின் அனுமதியோ அல்லது நீதிமன்ற உத்தரவோ பெறப்படாமல், பயங்கரவாத தடுப்புச் சட்டத்தைப் பயன்படுத்திக் கைது செய்யப்பட்டார்.
அதனைத் தொடர்ந்து அவரது விடுதலையை வலியுறுத்தி பல்வேறு பகுதிகளில் போராட்டங்கள் நடத்தப்பட்டு வருகின்றமை குறிப்பிடத்தக்கது.
