இலங்கை கடற்படையால் சிறைப்பிடிக்கப்படும் மீனவர்கள் தொடர்பாக மத்திய அரசு எந்த விதமான நடவடிக்கை எடுக்கவில்லை என மத்திய அரசுக்கு எதிராக மீனவர் காங்கிரஸ் சார்பில் தமிழகத்தின் பாம்பன் பேருந்து நிலையம் அருகே ஆர்ப்பாட்டம் முன்னெடுக்கப்பட்டது.
குறித்த ஆர்ப்பாட்டத்தில் இலங்கைச் சிறையில் உள்ள மீனவர்களின் குடும்பத்தினர் மற்றும் ராமேஸ்வரம் அனைத்து விசைப்படகு மீனவர் சங்கத் தலைவர்கள், மீனவர்கள் கலந்து கொண்டனர்.
இலங்கைச் சிறையில் உள்ள மீனவர்களை உடனடியாக படகுடன் விடுதலை செய்யக் கோரியும், மீனவர் கைதுக்கு எந்தவிதமான நடவடிக்கை எடுக்காமல் மத்திய அரசு மௌனம் காப்பதால் உடனடியாக மத்திய அரசு பதவி விலக வேண்டும் என வலியுறுத்தியும் ஆர்ப்பாட்டம் நடைபெற்றது.
எல்லை தாண்டி மீன்பிடித்ததாக சமீப காலமாக தமிழகத்தைச் சேர்ந்த சுமார் 60 இற்கும் மேற்பட்ட மீனவர்கள் அடுத்தடுத்து கைது செய்யப்பட்டுள்ளதுடன், கடந்த வாரம் இராமநாதபுரம் மாவட்டம் ராமேஸ்வரத்தைச் சேர்ந்த சுமார் 30 இற்கும் மேற்பட்ட மீனவர்கள் எல்லை தாண்டி மீன்பிடித்ததாக இலங்கை கடற்படை கைது செய்து சிறையில் அடைத்துள்ளதாகவும் போராட்டக்காரர்கள் குறிப்பிட்டுள்ளனர்.
