சுமார் 260 புலம்பெயர்ந்தோருடன் பயணித்த படகொன்று ஏமன் அருகே கடலில் மூழ்கியதில் 49 பேர் வரை உயிரிழந்துள்ளதுடன், 140 பேரை காணவில்லை என ஐநா சர்வதேச அமைப்பு அறிவித்துள்ளது.
உயிரிழந்தவர்களில் 6 சிறுவர்களும் 31 பெண்களும் அடங்குவதாக குறித்த அமைப்பு தெரிவித்துள்ளது.
சோமாலியா மற்றும் எத்தியோப்பியாவைச் சேர்ந்த புலம்பெயர்வோரை ஏற்றிச்சென்ற படகொன்று இவ்வாறு கடலில் மூழ்கி விபத்துக்குள்ளாகியுள்ளது.
இது தொடர்பாக ஐநா சர்வதேச அமைப்பு வெளியிட்டுள்ள அறிவிப்பில்,
சோமாலியாவின் வடக்கு கடற்கரையிலிருந்து சுமார் 260 சோமாலியர்கள் மற்றும் எத்தியோப்பியர்களை ஏற்றிக்கொண்டு ஏடன் வளைகுடா வழியாக பயணித்த படகொன்று, 320 கிலோமீற்றர் பயணித்த நிலையில், ஏமனின் தெற்கு கடற்கரை பகுதியில் நேற்று (11) கடலில் மூழ்கியதாக அறிவித்துள்ளது.
இந்த விபத்தில், குறைந்தது 49 பேர் வரை உயிரிழந்துள்ளதாகவும் அவர்களின் உடல்கள் மீட்கப்பட்டுள்ளதாகவும், குறித்த அமைப்பு தெரிவித்துள்ளது.
அத்துடன், 140 பேர் வரை காணவில்லை என அறிவித்துள்ள ஐநா சர்வதேச அமைப்பு, அவர்களை தேடும் பணி தொடர்ந்து நடைபெற்று வருவதாக அறிவித்துள்ளது.
மேலும், படகில் பயணித்தவர்களில் இதுவரை 71 பேர் உயிருடன் மீட்கப்பட்டுள்ளதாகவும் தெரிவிக்கப்பட்டுள்ளது.
இந்த சம்பவத்தையடுத்து செய்தியாளர்களிடம் கருத்து தெரிவித்த புலம்பெயர்வோருக்கான ஐநா சர்வதேச அமைப்பின் செய்தித்தொடர்பாளர் முகமதலி அபுனஜெலா,
புலம்பெயர்வோர் எதிர்கொள்ளும் சவால்களுக்கு விரைவாக தீர்வு காண்பதற்கான மற்றுமொரு நினைவூட்டலாக இந்தச் சம்பவம் அமைந்துள்ளதாக குறிப்பிட்டுள்ளார்.
அத்துடன், அவசரமாக புலம்பெயர்வோர் எதிர்கொள்ளும் சவால்களுக்குத் தீர்வு காண்பதோடு, அவர்களின் பாதுகாப்பை உறுதி செய்வதற்கு ஒன்றிணைந்து செயற்பட வேண்டிய அவசியத்தையும் முகமதலி அபுனஜெலா வலியுத்தியுள்ளார்.
இதேவேளை, பொருளாதார ரீதியாக மிகவும் பின்தங்கிய கிழக்கு ஆப்ரிக்க நாடுகளில் இருந்து வளைகுடா நாடுகளுக்கு புலம்பெயர்வோர் எண்ணிக்கை தொடர்ந்தும் அதிகரித்து வருவதாக புலம்பெயர்வோருக்கான ஐநா சர்வதேச அமைப்பு தெரிவித்துள்ளது.
அதன்படி, யேமனில் ஏறக்குறைய 10 ஆண்டுகளாக உள்நாட்டுப் போர் இருந்தபோதிலும், 2021 முதல் 2023 வரை ஆண்டுதோறும் அந்நாட்டுக்கு வரும் புலம்பெயர்ந்தோரின் எண்ணிக்கை 27,000 இலிருந்து 90,000 ஆக உயர்ந்துள்ளதாகவும், சுமார் 3,80,000 புலம்பெயர்ந்தோர் தற்போது ஏமனில் உள்ளதாகவும் புலம்பெயர்வோருக்கான ஐநா சர்வதேச அமைப்பு சுட்டிக்காட்டியுள்ளது.
