மொஹமட் யூனுஸ் தலைமையிலான இடைக்கால அரசாங்கத்தை கவிழ்க்க சதி செய்ததாக குற்றச்சாட்டுகள் எழுந்துள்ள நிலையில், பதவி நீக்கம் செய்யப்பட்ட பிரதமர் ஷேக் ஹசீனா மற்றும் 11 பேருக்கு எதிராக சிவப்பு அறிவிப்பு வெளியிடுமாறு பங்களாதேஷ் காவல்துறை இன்டர்போலிடம் கோரிக்கை விடுத்துள்ளது.
இந்த சிவப்பு அறிவிப்பு வெளியிடப்பட்டால், குற்றம் சாட்டப்பட்டவர்களை நாடு கடத்துவது அல்லது அதுபோன்ற சட்ட நடைமுறைகள் நிலுவையில் இருப்பதைக் கண்டுபிடித்து தற்காலிகமாக கைது செய்ய உதவும்.
உள்நாட்டுப் போரைத் தூண்டி இடைக்கால நிர்வாகத்தை பதவி நீக்கம் செய்ய சதித்திட்டம் தீட்டியதாக ஹசீனா மற்றும் 72 பேர் மீது பங்களாதேஷ் பொலிஸார் அண்மையில் வழக்குப் பதிவு செய்திருந்தனர்.
படுகொலை மற்றும் ஊழல் உட்பட 100 க்கும் மேற்பட்ட வழக்குகளை தற்சமயம் ஹசீனா எதிர்கொள்கிறார்.
சர்வதேச குற்றவியல் நீதிமன்றத்தின் தலைமை வழக்கறிஞர் அலுவலகம், கடந்த ஆண்டு நவம்பரில், ஹசீனா மற்றும் தப்பியோடியவர்களாகக் கருதப்படும் மற்றவர்களைக் கைது செய்வதில் இன்டர்போலின் உதவியைப் பெறுமாறு காவல் தலைமையகத்தை முறையாகக் கோரியிருந்தது.
கடந்த 2024 ஆம் ஆண்டு ஆகஸ்ட் 5 ஆம் திகதி, மாணவர் தலைமையிலான ஒரு பெரிய எழுச்சி அவரது 16 ஆண்டுகால அவாமி லீக் ஆட்சியைக் கவிழ்த்த பிறகு, ஹசீனா பங்களாதேஷை விட்டு வெளியேறினார்.
அதன் பின்னர் அவர் இந்தியாவில் வசித்து வருகிறார்.
மனிதகுலத்திற்கு எதிரான குற்றங்கள் அல்லது படுகொலைகள் போன்ற குற்றச்சாட்டுகளின் பேரில் அவரது கட்சித் தலைவர்கள் மற்றும் அமைச்சர்களில் பெரும்பாலோர் கைது செய்யப்பட்டனர் அல்லது விசாரணையைத் தவிர்க்க வெளிநாடுகளுக்குத் தப்பிச் சென்றனர்.
