ஐரோப்பிய ஒன்றியத்திலிருந்து இறக்குமதி செய்யப்படும் கார்கள் மீதான வரிகளை 110% இலிருந்து 40% ஆகக் குறைக்க இந்தியா திட்டமிட்டுள்ளதாக வட்டாரங்கள் தெரிவித்தன.
செவ்வாய்க்கிழமை (26) தொடக்கத்தில் இரு தரப்பினரும் ஒரு சுதந்திர வர்த்தக ஒப்பந்தத்தில் கையெழுத்திடுவதால், நாட்டின் பரந்த சந்தையின் மிகப்பெரிய தொடக்கமாக இது இருக்கும்.
பிரதமர் நரேந்திர மோடியின் அரசாங்கம், 27 நாடுகளைக் கொண்ட இந்த அமைப்பிலிருந்து 15,000 யூரோக்களுக்கு மேல் ($17,739) இறக்குமதி விலை கொண்ட குறிப்பிட்ட எண்ணிக்கையிலான கார்களுக்கான வரியை உடனடியாகக் குறைக்க ஒப்புக்கொண்டுள்ளதாக, பேச்சுவார்த்தைகள் குறித்து விளக்கப்பட்ட இரண்டு வட்டாரங்கள் கூறியுள்ளதாக ரொய்ட்டர்ஸ் தெரிவித்துள்ளது.
இது காலப்போக்கில் 10% ஆகக் குறைக்கப்படும் என்றும், வோக்ஸ்வாகன், மெர்சிடிஸ் பென்ஸ் மற்றும் BMW போன்ற ஐரோப்பிய வாகன உற்பத்தியாளர்களுக்கு இந்திய சந்தைக்கான அணுகலை எளிதாக்கும் என்றும் அவர்கள் மேலும் கூறினர்.
பேச்சுவார்த்தைகள் ரகசியமானவை என்பதால் தகவல்களை வழங்கிய வட்டாரங்கள் பெயர் கூற விரும்பவில்லை என்றும் ரொய்ட்டர்ஸ் கூறியுள்ளது.
இதேவளை, இந்தியாவின் வர்த்தக அமைச்சகமும் ஐரோப்பிய ஆணையமும் இது குறித்து கருத்து தெரிவிக்க மறுத்துவிட்டன.
இந்தியாவும் ஐரோப்பிய ஒன்றியமும் செவ்வாய்க்கிழமை சுதந்திர வர்த்தக ஒப்பந்தத்திற்கான நீடித்த பேச்சுவார்த்தைகளின் முடிவை அறிவிக்கும் என்று எதிர்பார்க்கப்படுகிறது.
அமெரிக்கா மற்றும் சீனாவிற்கு அடுத்தபடியாக விற்பனையில் இந்தியா உலகின் மூன்றாவது பெரிய கார் சந்தையாகும்.
ஆனால் அதன் உள்நாட்டு ஆட்டோமொபைல் துறை மிகவும் பாதுகாக்கப்பட்ட ஒன்றாகும்.
இறக்குமதி செய்யப்படும் கார்களுக்கு புது டெல்லி தற்போது 70% மற்றும் 110% வரிகளை விதிக்கிறது.
இந்த நிலையை டெஸ்லா தலைவர் எலோன் மஸ்க் உள்ளிட்ட நிர்வாகிகள் அடிக்கடி விமர்சிக்கின்றனர்.
