பிரிட்ஜெண்ட் (Bridgend) கவுண்டியில் உள்ள பென்கோயிட் (Pencoed) பகுதியில் நிகழ்ந்த மோதலில் காயமடைந்த நபர் சிகிச்சை பலனின்றி உயிரிழந்ததைத் தொடர்ந்து, 26 வயது இளைஞர் மீது கொலைக் குற்றம் சுமத்தப்பட்டுள்ளது.
கடந்த சனிக்கிழமை(28) அதிகாலை, பென்கோயிட்டில் உள்ள ஃபெலிண்ட்ரே (Felindre) சாலையில் நிகழ்ந்த ஒரு வன்முறைச் சம்பவம் தொடர்பாக அவசர சேவையினருக்குத் தகவல் வழங்கப்பட்டது.
இதில் படுகாயமடைந்த 58 வயதான டேவிட் ரோஜர்ஸ் (David Rogers) என்பவர் மிகவும் கவலைக்கிடமான நிலையில் மருத்துவமனைக்குக் கொண்டு செல்லப்பட்டார்.
தீவிர சிகிச்சை அளிக்கப்பட்டு வந்த நிலையில், அவர் நேற்றுமுன்தினம் சிகிச்சை பலனின்றி உயிரிழந்தார்.
இந்த நிலையில் இச்சம்பவம் தொடர்பாக பென்கோயிட் பகுதியைச் சேர்ந்த 26 வயதான லியாம் வால்டர்ஸ் (Liam Walters) என்பவரைத் தெற்கு வேல்ஸ் பொலிஸார் கைது செய்தனர்.
அவர் மீது கொலைக் குற்ற பிரிவின் கீழ் நேற்றையதினம் வழக்குப் பதிவு செய்யப்பட்டு இன்று நீதிமன்றத்தில் ஆஜர்படுத்தப்பட்டார்.
இதேவேளை, கடந்த சனிக்கிழமை அதிகாலை 12:30 மணி முதல் 4:30 மணி வரை சம்பவம் இடம்பெற்ற பகுதியில் இருந்தவர்கள் அல்லது இச்சம்பவம் தொடர்பாக ஏதேனும் தகவல்கள் தெரிந்தவர்கள் உடனடியாகப் பொலிஸாரைத் தொடர்பு கொள்ளுமாறு கேட்டுக்கொள்ளப்பட்டுள்ளனர்.
மேலும் உயிரிழந்த டேவிட் ரோஜர்ஸின் குடும்பத்தினருக்கு அதிகாரிகள் மூலம் தேவையான ஆதரவும் ஆலோசனைகளும் வழங்கப்பட்டு வருவதாகப் பொலிஸார் தெரிவித்துள்ளனர்.
