இலங்கையின் தேசிய டெஸ்ட் மற்றும் ஒருநாள் கிரிக்கெட் அணிகளின் உறுப்பினர்கள் மீது ‘தனியாள் முற்பண வருமான வரியை’ (APIT) விதிப்பதற்கான உள்நாட்டு இறைவரித் திணைக்களத்தின் (IRD) ஆணையாளர் நாயகத்தின் முடிவை இரத்து செய்து, மேன்முறையீட்டு நீதிமன்றம் உத்தரவு ஒன்றை பிறப்பித்துள்ளது.
இலங்கையின் டெஸ்ட் மற்றும் ஒருநாள் கிரிக்கெட் அணிகளைப் பிரதிநிதித்துவப்படுத்தும் ஒரு குழுவினர் தாக்கல் செய்த மனுக்கள் மீதான தீர்ப்பை வழங்கும்போது, மேன்முறையீட்டு நீதிமன்றம் இந்த உத்தரவைப் பிறப்பித்தது.
இருப்பினும், இம்விவகாரம் தொடர்பாக வருவாய் ஆணையர் எதிர்காலத்தில் எடுக்கக்கூடிய முடிவுகளுக்குப் பாதிப்பு ஏற்படாத வகையிலேயே இந்த உத்தரவு பிறப்பிக்கப்பட்டதாக நீதிபதிகள் குறிப்பிட்டனர்.
ஸ்ரீலங்கா கிரிக்கெட் (SLC) நிறுவனத்தின் ஊழியர்களாகக் கருதி, அவர்களது ஊதியத்திலிருந்து தனியாள் முற்பண வருமான வரியை
பிடித்தம் செய்ய உள்நாட்டு வருவாய் ஆணையாளர் நாயகம் எடுத்த முடிவைச் செல்லாததாக்கும் வகையிலான உத்தரவு ஒன்றைக் கோரி, இலங்கை டெஸ்ட் அணித் தலைவர் தனஞ்சய டி சில்வா, முன்னாள் ஒருநாள் போட்டி அணித் தலைவர் சரித் அசலங்க மற்றும் தேசிய மகளிர் கிரிக்கெட் அணியின் பல உறுப்பினர்கள் இந்த மனுவைத் தாக்கல் செய்தனர்.
விசாரணையின் போது, உள்நாட்டு வருவாய் சட்டத்தில் மேற்கொள்ளப்பட்ட அண்மைய திருத்தங்கள் சுயாதீன சேவை வழங்குநர்களுக்கு எனத் தனிப் பிரிவொன்றை அறிமுகப்படுத்தியுள்ளதாகவும், இப்பிரிவின் கீழ் வரும் தனிநபர்கள் APIT-ஐச் செலுத்தக் கடமைப்பட்டவர்கள் அல்ல என்றும் நீதிமன்றம் குறிப்பிட்டது.
