ஜப்பானில் திங்களன்று (28) நடைபெற்ற 2026 ஆசிய விளையாட்டுப் போட்டிகளின் ஆடவர் ஈட்டி எறிதல் பிரிவில், உலகின் முதல் நிலை வீரரான ரூமேஷ் தரங்க பத்திரகே ( Rumesh Tharanga Pathirage) தங்கப் பதக்கம் வென்றார்.
அதேவேளையில், இந்தியாவின் யாஷ் வீர் சிங் மற்றும் ரோஹித் யாதவ் ஆகியோர் முறையே வெள்ளி மற்றும் வெண்கலப் பதக்கங்களை வென்றனர்.
நகோயா சிட்டி மிசுஹோ பார்க் தடகள மைதானத்தில் நடைபெற்ற போட்டியில், ருமேஷ் தரங்கவின் வெற்றிக்குக் காரணமான வீச்சு 88.55 மீட்டர் தூரத்தை எட்டியது.
அதேவேளையில், யாஷ் வீர் சிங் தனது தனிப்பட்ட சிறந்த சாதனையாக 85.72 மீட்டர் தூரத்தையும், ரோஹித் யாதவ் 84.35 மீட்டர் தூரத்தையும் பதிவு செய்து பதக்க மேடையை அலங்கரித்தனர்.
நடப்பு ஒலிம்பிக் சாம்பியனும் ஆசிய சாதனையாளருமான பாகிஸ்தானின் அர்ஷத் நதீம், 80.29 மீட்டர் தூரத்துடன் நான்காவது இடத்தைப் பிடித்தார்.
இந்த முடிவின் மூலம், ஆசிய விளையாட்டுப் போட்டிகளில் ஆடவர் ஈட்டி எறிதல் பிரிவில் தொடர்ந்து இரண்டாவது முறையாக இந்தியா இரண்டு பதக்கங்களை வென்றுள்ளது.
2023 ஹாங்சூ போட்டியில், நீரஜ் சோப்ரா 88.88 மீட்டர் தூரம் எறிந்து தங்கப் பதக்கத்தையும், கிஷோர் ஜெனா 87.54 மீட்டர் தூரம் எறிந்து வெள்ளிப் பதக்கத்தையும் வென்று, இந்தியாவுக்கு முதல் இரண்டு இடங்களைப் பெற்றுத் தந்தனர்.
2018-ல் ஜகார்த்தா தங்கப் பதக்கம் வென்ற நீரஜ், காயம் காரணமாக ஜப்பானில் நடைபெற்ற போட்டியில் பங்கேற்கவில்லை.
திங்களன்று நடைபெற்ற போட்டியில் யாஷ் வீர் சிங் 83.56 மீட்டர் தூரத்துடன் ஆரம்பத்தில் முன்னிலை வகித்தார்; பின்னர் ரோஹித் யாதவ் மூன்றாவது சுற்றில் 84.35 மீட்டர் தூரத்தை எட்டி முதலிடத்தைப் பிடித்தார்.
இதன் மூலம், போட்டியின் பாதியில் இந்த இரு இந்தியர்களும் தரவரிசையில் முதல் இரண்டு இடங்களைப் பிடித்தனர்.
இருப்பினும், நான்காவது சுற்றில் ரூமேஷ் தரங்கா போட்டியின் போக்கையே தலைகீழாக மாற்றினார்.
73.53 மீட்டர், 83.34 மீட்டர் மற்றும் ஒரு ‘ஃபவுல்’ (விதிமீறல்) முயற்சிக்குப் பின்னர், அந்த இலங்கை வீரர் ஈட்டியை 88.33 மீட்டர் தூரத்திற்கு வீசி வலுவான முன்னிலையைப் பெற்றார்.
பின்னர், தனது கடைசி முயற்சியில் அந்தத் தூரத்தை 88.55 மீட்டராக அவர் மேம்படுத்தினார்.
நான்காவது சுற்றில் 84.31 மீட்டர் தூரம் எறிந்த யாஷ் வீர் சிங், தனது ஐந்தாவது முயற்சியில் அதை 85.14 மீட்டராக மேம்படுத்தி, ரோஹித் யாதவை முந்தி வெள்ளிப் பதக்க இடத்தைப் பிடித்தார்.
தனது ஆறாவது மற்றும் கடைசி முயற்சியில் அவர் 85.72 மீட்டர் என்ற தனது சிறந்த தனிப்பட்ட சாதனையைப் பதிவு செய்தார்.
கிளாஸ்கோவில் நடைபெற்ற 2026 காமன்வெல்த் விளையாட்டுப் போட்டிகளில், அந்த இந்திய வீரர் 85.41 மீட்டர் என்ற தனது அப்போதைய சிறந்த தனிப்பட்ட சாதனையைப் பதிவு செய்து வெண்கலப் பதக்கம் வென்றார்.
அங்கு ரூமேஷ் தரங்கா தங்கப் பதக்கத்தையும், நீரஜ் வெள்ளிப் பதக்கத்தையும் வென்றனர்.
23 வயதான ரூமேஷ் தரங்கா, கடந்த ஜூன் மாதம் ரோமில் 92.62 மீட்டர் தூரம் எறிந்து இலங்கை தேசிய சாதனையையும், உலகிலேயே சிறந்த சாதனையையும் படைத்தார்.
சூரிச்சில் 92.07 மீட்டர் தூரம் எறிந்த அவர், இந்த மாத தொடக்கத்தில் நடைபெற்ற உலக தடகள அல்டிமேட் சாம்பியன்ஷிப் போட்டியில் 91.09 மீட்டர் தூரம் எறிந்து வெற்றி பெற்றமையும் குறிப்பிடத்தக்கது.
