சபுகஸ்கந்தை எண்ணெய் சுத்திகரிப்பு நிலையம் கடந்த ஒன்பது மாதங்களில் 417 மில்லியன் அமெரிக்க டொலர் இலாபத்தை ஈட்டியுள்ளதாக இலங்கை பெட்ரோலியக் கூட்டுத்தாபனத்தின் (CPC) தலைவர் டி.ஜே. ராஜகருணா தெரிவித்துள்ளார்.
அரசாங்கத் தகவல் திணைக்களத்தில் நடைபெற்ற ஊடகச் சந்திப்பில் கலந்துகொண்டபோது அவர் இந்தக் கருத்துகளைத் தெரிவித்தார்.
முன்னதாக மூடப்படவும், இலங்கை பெற்றோலியக் கூட்டுத்தாபனத்திலிருந்து அகற்றப்படவும் திட்டமிடப்பட்டிருந்த இந்த எண்ணெய் சுத்திகரிப்பு நிலையம், நடப்பாண்டின் முதல் ஒன்பது மாதங்களில் 417 மில்லியன் அமெரிக்க டொலர் லாபத்தை ஈட்டியுள்ளது.
அதே காலப்பகுதியில், இந்த எண்ணெய் சுத்திகரிப்பு நிலையமானது நாட்டிற்கு 1 பில்லியன் அமெரிக்க டொலருக்கும் அதிகமான அந்நியச் செலாவணியைச் சேமிக்க உதவியுள்ளது.
தற்போதைய நெருக்கடி நிலைக்கு மத்தியிலும், இலங்கை பெற்றோலியக் கூட்டுத்தாபனம் முதல் ஒன்பது மாதங்களில் 28 பில்லியன் ரூபாய் இலாபத்தைப் பதிவு செய்துள்ளது.
ஆண்டின் இறுதியில் 28 பில்லியன் முதல் 30 பில்லியன் ரூபாய் வரையிலான இலாபத்தை எட்டும் என்று எதிர்பார்ப்படுகின்றது.
இதற்கிடையில், உலக சந்தையில் எரிபொருள் விலை குறைந்து வருவதன் பலன்களை விரைவில் நுகர்வோருக்குக் கொண்டு சேர்க்க நடவடிக்கை எடுக்கப்படும்.
நீண்ட காலமாக எரிபொருள் விலை அதிகரித்து வந்த நிலையில், கடந்த இரண்டு நாட்களுக்கு முன்புதான் விலை குறைந்துள்ளதாகத் தகவல்கள் வெளியாகியுள்ளன.
மேலும், இந்தச் சூழலை இலங்கை பெற்றோலியக் கூட்டுத்தாபனம் உன்னிப்பாகக் கவனித்து வருகின்றது.
விலை குறைப்பின் பலன்கள் உறுதியானதும் அவற்றை நுகர்வோருக்குக் கிடைக்கச் செய்யவும் நடவடிக்கை எடுக்கப்படும் என்றும் அவர் இதன்போது கூறினார்.
தற்போதைய உள்நாட்டு எரிபொருள் விலைகளை பெப்ரவரி மாத விலைகளுடன் ஒப்பிட்ட ராஜகருணா, ஒரு லிட்டர் பெட்ரோலின் விலை 292 ரூபாயிலிருந்து 424 ரூபாயாகவும், ஒட்டோ டீசலின் விலை 281 ரூபாயிலிருந்து 397 ரூபாயாகவும் உயர்ந்துள்ளதாகத் தெரிவித்தார்.
உலகளாவிய எரிபொருள் விலைகள் சுமார் 85% அதிகரித்திருந்த போதிலும், உள்நாட்டில் பெட்ரோல் விலை சுமார் 45% மட்டுமே உயர்ந்துள்ளதாகவும், ஒட்டோ டீசல் விலை சுமார் 43% மட்டுமே அதிகரித்துள்ளதாகவும் அவர் சுட்டிக்காட்டினார்.
ஏப்ரல், மே மற்றும் ஜூன் மாதங்களில் அரசாங்கம் வழங்கிய மானியங்களே இதற்குக் காரணம் என்று குறிப்பிட்ட தலைவர் ராஜகருணா, இந்த மானியமானது ஒரு லிட்டர் டீசலுக்கு 100 ரூபாயாகவும், ஒரு லிட்டர் பெட்ரோலுக்கு 20 ரூபாயாகவும் இருந்ததாகத் தெரிவித்தார்.
கடந்த மாதம் டீசல் ஒரு லிட்டருக்கு 70 ரூபாயை அரசாங்கம் மானியமாக வழங்கியதாகவும், இந்த மாதம் மானியங்களுக்காக 41 பில்லியன் ரூபாய் ஒதுக்கப்பட்டிருப்பதாகவும் அவர் மேலும் தெரிவித்தார்.
இந்த மானியங்கள், உலக சந்தை விலையில் ஏற்பட்டுள்ள உண்மையான உயர்வுக்கு ஏற்ப அல்லாமல், உள்நாட்டு எரிபொருள் விலைகளை மிகக் குறைந்த மட்டத்தில் தொடர்ந்து வைத்திருக்க இலங்கை பெற்றோலியக் கூட்டுத்தாபனத்திற்கு உதவியுள்ளன என்றும் அவர் கூறினார்.
