இலங்கையில் நீடித்துவரும் இனப்பிரச்சினைக்கு இதுவரை தீர்வு எட்டப்படாதமை காரணமாகவே பொருளாதாரப் பிரச்சினையும் தொடர்வதாக நாடாளுமன்ற உறுப்பினர் வே.இராதாகிருஷ்ணன் தெரிவித்துள்ளார்.
ஆகவே பொருளாதாரப் பிரச்சினைக்கு தீர்வினைக் காண்பதாக இருந்தால் நாட்டில் உள்ள சகல இனங்களுக்கு இடையிலும் ஒற்றுமையை ஏற்படுத்த வேண்டும் என அவர் வலியுறுத்தியுள்ளார்.
இலங்கை தமிழ் மக்களுக்கான அரசியல் தீர்வை பெற்றுக்கொடுக்க தமிழக தலைவர்கள் ஊடாக இந்திய அரசாங்கத்தை வலியுறுத்தும் மாநாட்டில் கலந்துகொண்டு கருத்து தெரிவிக்கும்போதே அவர் இதனை குறிப்பிட்டுள்ளார்.
அதேநேரம் 200ஆண்டுகளுக்கு முன்னதாக தமிழகத்தின் பல பாகங்களில் இருந்து தோட்டப் பணிகளுக்காக கூலிகளாக கொண்டு செல்லப்பட்ட மக்கள் இன்னமும் நெருக்கடிக்குள்ளேயே உள்ளார்கள் என்றும் அவர் சுட்டிக்காட்டியுள்ளார்.
ஆகவே தீர்க்கப்படாமல் உள்ள மலையக மக்கள் பிரச்சினைகளும் தீர்க்கப்பட வேண்டும் என்றும் அதற்காக அனைத்து தமிழ்க் கட்சிகளும் ஒன்றிணைந்து செயற்பட வேண்டும் என்றும் வே.இராதாகிருஷ்ணன் கோரிக்கை விடுத்துள்ளார்.
