கைதடி அரச முதியோர் இல்லத்தின் திறந்தவெளி அரங்கில் 2026 ஆம் ஆண்டுக்கான முதியோர் வார நிகழ்வுகள் இன்று சிறப்புற ஆரம்பமாகின.
2026 ஆம் ஆண்டின் சர்வதேச முதியோர் தினத்திற்கான “நீண்ட ஆயுளின் யுகம்: நீண்ட காலம் வாழும் மக்களுக்கேற்ப அமைப்புகளை மறுசிந்தனை செய்தல்” என்ற கருப்பொருளை அடிப்படையாகக் கொண்டு இந்நிகழ்வுகள் ஏற்பாடு செய்யப்பட்டுள்ளன.
முதல் நாள் நிகழ்வானது வடக்கு மாகாண சமூக சேவைகள் பணிப்பாளர் திருமதி தனுஜா லுக்சாந்தன் தலைமையில் நடைபெற்ற இந்நிகழ்வில், பிரதம அதிதியாக மகளிர் விவகார அமைச்சின் செயலாளர் திருமதி அன்ரன் யோகநாயகம் கலந்து சிறப்பித்தார்.
சிறப்பு அதிதிகளாக வடக்கு மாகாண சமூக சேவைகள் திணைக்களத்தின் உள்ளகக் கணக்காய்வாளர் செல்வி எம். சிவகுமாரி மற்றும் கைதடி, சித்த போதனா வைத்தியசாலையின் சிரேஷ்ட வைத்தியர் திரு ச. கணேசன் ஆகியோர் கலந்து கொண்டனர்.
கௌரவ அதிதிகளாக வடக்கு மாகாண சமூக சேவைகள் திணைக்களத்தின் தலைமைப்பீட சமூக சேவை உத்தியோகத்தர், யாழ்ப்பாண மாவட்ட சமூக சேவை உத்தியோகத்தர் திரு சு. வருதபாஸ்கரன், நல்லூர் சமூக சேவை உத்தியோகத்தர் திருமதி அனுஷா அ., ஊர்காவற்றுறை சமூக சேவை உத்தியோகத்தர் செல்வி க. சிவகௌரிநாயகி ஆகியோர் கலந்து சிறப்பித்தனர்.
முதியோர் சமூகத்தின் கண்ணியம், நல்வாழ்வு, சமூகப் பங்கேற்பு மற்றும் நீண்ட ஆயுளுக்கு ஏற்ற வகையில் சமூக அமைப்புகளை மாற்றியமைப்பதன் அவசியத்தை வலியுறுத்தும் வகையில் முதியோர் வார நிகழ்வுகள் முன்னெடுக்கப்படுகின்றன.
இந்நிகழ்விற்கான ஏற்பாடுகளை கைதடி அரச முதியோர் இல்லத்தின் அத்தியட்சகர் திரு நா. இராஜமனோகரன் தலைமையிலான உத்தியோகத்தர்கள் மேற்கொண்டிருந்தனர்.
இந்நிகழ்வில் சிறுவர்கள், முதியோர் மற்றும் சனசமூக நிலையங்களின் உறுப்பினர்கள் உள்ளிட்ட பலரும் பங்குபற்றியிருந்தமை குறிப்பிடத்தக்கது.
