மலையகத்தில் நிலவும் சீரற்ற வானிலைக்கு மத்தியிலும் தேயிலைத் தோட்டத்தில் பணியில் ஈடுபட்டிருந்த பெண் தொழிலாளர்கள் குளவிக்கொட்டுக்கு இலக்காகியுள்ள சம்பவம் சோகத்தை ஏற்படுத்தியுள்ளது.
மலையகத்தில் பெய்து வரும் கடும் மழையையும் பொருட்படுத்தாது தேயிலைத் தோட்டத்தில் கொழுந்து பறித்துக் கொண்டிருந்த நான்கு பெண் தொழிலாளர்கள் குளவிக்கொட்டுக்கு இலக்காகி வைத்தியசாலையில் அனுமதிக்கப்பட்டுள்ளனர்.
பொகவந்தலாவ, கெர்க்கஸ்வோல்ட் மேல் பிரிவுத் தோட்டத்தில் இன்று (14) மதியம் 12.30 மணியளவில் இச்சம்பவம் இடம்பெற்றுள்ளது.
தொழிலாளர்கள் வழமை போல தேயிலை மலையில் கொழுந்து பறித்துக் கொண்டிருந்தபோது, அங்கிருந்த தேயிலைச் செடி ஒன்றின் அடியில் மறைந்திருந்த குளவிக்கூடு திடீரென கலைந்து வந்து அவர்களைத் தாக்கியுள்ளது.
குளவிக்கொட்டுக்கு இலக்காகி காயமடைந்த நான்கு பெண் தொழிலாளர்களும் உடனடியாக மீட்கப்பட்டு பொகவந்தலாவ பிரதேச வைத்தியசாலையில் அனுமதிக்கப்பட்டனர்.
தற்போது சிகிச்சை பெற்று வரும் அவர்களின் உடல்நிலை குறித்து அச்சமடையத் தேவையில்லை என வைத்தியசாலைப் பேச்சாளர் ஒருவர் தெரிவித்துள்ளார்.
சீரற்ற வானிலைக்கு மத்தியிலும் வாழ்வாதாரத்திற்காகப் பணியில் ஈடுபட்டிருந்த தொழிலாளர்கள் இச்சம்பவத்திற்கு முகம் கொடுத்துள்ளமை அப்பகுதியில் சோகத்தை ஏற்படுத்தியுள்ளது.
இச்சம்பவம் தொடர்பாக பொகவந்தலாவ பொலிஸார் மேலதிக விசாரணைகளை முன்னெடுத்து வருகின்றனர்.
