வத்துப்பிட்டிவல பொலிஸ் நிலையத்தைச் சேர்ந்த உதவி ஆய்வாளர் ஒருவர், கடமையில் தகாத முறையில் நடந்து கொண்டதாலும், பொதுமக்களிடம் அச்சுறுத்தும் வகையில் பேசியதாலும் இடைநீக்கம் செய்யப்பட்டுள்ளார்.
23ஆம் திகதியன்று வத்துப்பிட்டிவல மருத்துவமனை அருகே உள்ள ஒரு தனியார் நிறுவனத்தின் முன்பாக அலுவல் உடை அணிந்திருந்த நிலையில், கடமைக்கு தகாத முறையில் நடந்து கொண்டதற்காக அந்த உதவி ஆய்வாளர் இடைநீக்கம் செய்யப்பட்டதாக பொலிஸ் தெரிவித்தது.
ஒரு நிறுவனத்தின் முன்பாக மோட்டார் சைக்கிளை நிறுத்திய நபரை, அந்த பொலிஸ் அதிகாரி அச்சுறுத்தும் வகையில் திட்டும் காணொளிக் காட்சி ஒன்று சமீப நாட்களாக சமூக ஊடகங்களில் பரவி வருகிறது.
சம்பந்தப்பட்ட அதிகாரியின் செயல்கள் இலங்கை பொலிஸ் மற்றும் ஒட்டுமொத்த பொது சேவைக்கும் அவப்பெயரை ஏற்படுத்துவதால், ஸ்தாபனங்கள் நெறிமுறையின் விதிகளுக்கு இணங்க, அந்த அதிகாரி உடனடியாகப் பணியிடை நீக்கம் செய்யப்பட்டுள்ளார்.
சட்டத்தையும் ஒழுங்கையும் நிலைநாட்டக் கடமைப்பட்ட அதிகாரிகளின் இத்தகைய கண்ணியமற்ற அல்லது முறையற்ற நடத்தையைத் தாங்கள் பொறுத்துக்கொள்ள மாட்டோம் என்றும், பொதுமக்களின் பாதுகாப்பு மற்றும் உரிமைகளுக்காக உரிய மரியாதையுடன் நிற்போம் என்றும் பொலிஸ் துறை கூறியுள்ளது.
