முன்னணி கால்பந்து நட்சத்திரமான கிறிஸ்டியானோ ரொனால்டோ, தனது நீண்டகாலத் துணையும் மொடலும் சமூக ஊடகப் பிரபலமுமான ஜோர்ஜினா ரோட்ரிக்ஸை போர்த்துக்கலில் நடைபெற்ற சிவில் திருமண விழாவில் திருமணம் செய்துகொண்டார்.
41 வயதான ரொனால்டோ, திருமண மோதிரங்களை அணிந்திருக்கும் தங்களது கைகளைக் காட்டும் புகைப்படம் ஒன்றை தனது இன்ஸ்டாகிராம் பக்கத்தில் பதிவிட்டார்.
தலைநகர் லிஸ்பனுக்கு அருகிலுள்ள கடலோர நகரமான காஸ்காய்சில் ஆகஸ்ட் 11 அன்று அந்த ஜோடி திருமணம் செய்துகொண்டதாகத் தெரிவித்த போர்த்துகீசிய ஊடகங்கள், இந்நிகழ்வை ‘ஆண்டின் சிறந்த திருமணம்’ என்று வர்ணித்தன.
இந்த நிகழ்வில் தம்பதியரின் ஐந்து குழந்தைகளும் கலந்துகொண்டதாகவும் போர்த்துகீசிய ஊடகங்கள் தெரிவிக்கின்றன.
இன்ஸ்டாகிராமில் பதிவிடப்பட்ட அந்தப் பதிவு, வெளியான 30 நிமிடங்களுக்குள்ளேயே 30 இலட்சத்திற்கும் அதிகமான லைக்குகளைப் பெற்றது.
கால்பந்து சூப்பர் ஸ்டாரான ரொனால்டோ, ஸ்பானிய கால்பந்து ஜாம்பவான்களான ரியல் மாட்ரிட் அணியில் இருந்தபோது முதன்முதலில் சந்தித்ததிலிருந்து, அவரும் அர்ஜென்டினாவில் பிறந்த ரோட்ரிக்ஸும் ஒரு தசாப்த காலமாக ஒன்றாக இருந்து வருகின்றனர்.
அந்த நேரத்தில் ரோட்ரிக்ஸ் பணிபுரிந்து கொண்டிருந்த மாட்ரிட்டில் உள்ள ஒரு குஸ்ஸி விற்பனை நிலையத்தில் பணி புரிந்து கொண்டிருந்தார்.
இந்தத் தம்பதியினர் சரியாக ஒரு வருடத்திற்கு முன்பு, 2025 ஆகஸ்ட் 11 அன்று தங்களது நிச்சயதார்த்தத்தை அறிவித்திருந்தனர்.
ரொனால்டோ மற்றும் ரோட்ரிக்ஸ் தம்பதியினருக்கு அலானா மற்றும் பெல்லா என்ற மகள்கள் உள்ளனர்.
மேலும், ரொனால்டோவின் மூத்த குழந்தைகளான கிறிஸ்டியானோ ஜூனியர் மற்றும் இரட்டையர்களான ஈவா மரியா மற்றும் மேட்டியோ ஆகியோரையும் அவர்கள் இணைந்து வளர்க்கின்றனர்.
2022-ஆம் ஆண்டில், ரொனால்டோ மான்செஸ்டர் யுனைடெட் அணியில் இரண்டாவது முறையாக விளையாடியபோது, பெல்லாவின் இரட்டைச் சகோதரரான ஏஞ்சல் பிறந்த சிறிது நேரத்திலேயே காலமானதால், இந்தக் குடும்பம் பெரும் துயரத்தைச் சந்தித்தது.
எக்காலத்திற்குமான மிகச்சிறந்த வீரர்களில் ஒருவராகக் கருதப்படும் ரொனால்டோ, தற்போது சவுதி ப்ரோ லீக் தொடரில் ‘அல்-நஸ்ர்’ (Al-Nassr) அணிக்காக விளையாடி வருகிறார்.
இவர் தனது தொழில்முறை கால்பந்து வாழ்க்கையில் 1,000 கோல்களை அடிக்கும் மைல்கல்லை நெருங்கிக்கொண்டிருக்கிறார்.
அண்மையில் அமெரிக்காவில் நடைபெற்ற உலகக் கிண்ணப் போட்டியில் பங்கேற்றதன் மூலம், அதிகபட்சமாக ஆறு முறை உலகக் கிண்ணத்தில் விளையாடிய சாதனையை அவர் சமன் செய்தார்.
அப்போட்டியில், ‘ரவுண்ட் ஆஃப் 16’ (Round of 16) சுற்றில் இறுதி வெற்றியாளரான ஸ்பெயின் அணியிடம் தோல்வியடைந்து போர்ச்சுகல் வெளியேறியமையும் குறிப்பிடத்தக்கது.
