ஆப்பிள் நிறுவனம் இன்று இரவு தனது அடுத்தகட்ட ஐபோன் (iPhone) வரிசையை அறிமுகப்படுத்தவுள்ளது.
கலிபோர்னியாவின் குபெர்டினோவைச் சேர்ந்த இந்தத் தொழில்நுட்ப ஜாம்பவான் நிறுவனம், இந்த ஆண்டுக்கான நிகழ்வை ‘Surprise and Shine’ (ஆச்சரியம் மற்றும் ஜொலிப்பு) என்று பெயரிட்டுள்ளது.
2019-க்குப் பிறகு இந் நிறுவனம் நேரடியாக (in-person) நடத்தும் முதல் நிகழ்வாக இது அமையவுள்ளது; ஏனெனில், அதற்கு இடைப்பட்ட காலங்களில் செப்டம்பர் மாத அறிமுக நிகழ்வுகள் அனைத்தும் இணையம் வாயிலாக முன்கூட்டியே பதிவு செய்யப்பட்ட காணொளிகள் மூலம் நடத்தப்பட்டன.
மேலும், ஆப்பிள் நிறுவனத்தின் புதிதாக நியமிக்கப்பட்ட தலைமை நிர்வாக அதிகாரி (CEO) ஜோன் டெர்னஸ் (John Ternus), மேடையில் நின்று புதிய சாதனங்களை அறிமுகப்படுத்துவதும் இதுவே முதல் முறையாகும்.
இதில் ‘ஐபோன் 18 ப்ரோ’ (iPhone 18 Pro) மற்றும் ‘ஐபோன் 18 ப்ரோ மேக்ஸ்’ (iPhone 18 Pro Max) ஆகியவை முக்கிய இடத்தைப் பிடிக்கும் என்று எதிர்பார்க்கப்படுகிறது.
நீண்ட காலமாக எதிர்பார்க்கப்பட்டு வரும் மடிக்கக்கூடிய ஐபோன் (foldable iPhone) இந்த செப்டம்பர் 9 அறிமுக நிகழ்வில் அறிமுகமானால், அது நிறுவனத்தின் ஸ்மார்ட்போன் வரிசையில் மிக முக்கியமான மாற்றத்தைக் கொண்டுவரும் வாய்ப்பும் உள்ளது.
ஆப்பிள் நிறுவனம் இந்த அறிமுக நிகழ்வை தங்களது இணையதளம், ஆப்பிள் டிவி (Apple TV) செயலி மற்றும் யூடியூப் (YouTube) ஆகியவற்றில் நேரலையாக ஒளிபரப்பவுள்ளது.
அங்கு நிகழ்வின் அனைத்து நிகழ்வுகளையும் நேரலையில் காணலாம்.
ஆப்பிள் நிறுவனத்தின் புதிய தலைமை நிர்வாக அதிகாரியான ஜோன் டெர்னஸ், தனது நியமனத்திற்குப் பின்னர் முதன்முறையாக மேடையேறவிருப்பதால், கடந்த ஆண்டை விட இம்முறை அதிகளவிலான பார்வையாளர்கள் இந்நிகழ்வைக் காண்பார்கள் என்று எதிர்பார்க்கப்படுகிறது.
ஆப்பிள் நிறுவனம் தான் வெளியிடத் திட்டமிட்டுள்ள தயாரிப்புகளை இன்னும் உறுதிப்படுத்தவில்லை என்றாலும், குறிப்பாக அதிகரித்து வரும் மெமரி செலவுகள் ஸ்மார்ட்போன் உற்பத்தியாளர்கள் மீது புதிய அழுத்தத்தை ஏற்படுத்தி வருவதால், வாங்குபவர்கள் எவ்வளவு விலை கொடுக்க வேண்டியிருக்கும் என்பது குறித்த ஆரம்ப அறிகுறியை கசிவுகளும் தொழில்துறை அறிக்கைகளும் வழங்கியுள்ளன.
இந்நிகழ்வில், புத்தகம் போல மடிக்கக்கூடிய வகையிலான தனது முதல் சாதனம், ஐபோன் 18 ப்ரோ (iPhone 18 Pro) தொடர், ஆப்பிள் வாட்ச் சீரிஸ் 12 (Apple Watch Series 12) மற்றும் ஏர்பாட்ஸ் 5 (AirPods 5) ஆகியவற்றை இந்நிறுவனம் அறிமுகப்படுத்தும் என்று எதிர்பார்க்கப்படுகிறது.
