தீபாவளி பட்டாசுகளால் காற்று மாசுபாட்டில் மூழ்கிய புது டெல்லி!

தீபாவளி பண்டிகையின் போது பட்டாசுகள் வெடிக்கப்பட்டதைத் தொடர்ந்து, இந்தியாவின் தலைநகரான புது டெல்லியின் சில பகுதிகளில் காற்றின் நச்சுத்தன்மை, உலக சுகாதார நிறுவனம் பரிந்துரைத்த தினசரி அளவை விட 58 மடங்குக்கும் அதிகமாக உயர்ந்ததாக காற்றுத் தரக் கண்காணிப்புத் தரவுகள் தெரிவிக்கின்றன.

உலகின் மிகவும் மாசுபட்ட தலைநகரங்களில் ஒன்றான இங்கு, லட்சக்கணக்கான மக்கள் தீபாவளி பண்டிகையை பட்டாசுகள் வெடித்துக் கொண்டாடுகின்றனர். 

இது, வாகனப் புகைகள், விவசாய நிலங்களில் பயிர்க்கழிவுகளை எரித்தல் மற்றும் தொழிற்சாலைகளால் ஏற்படும் குளிர்காலப் புகைமூட்டத்தை மேலும் தீவிரமடையச் செய்கிறது.

குறைவான உமிழ்வை ஏற்படுத்தும் வகையில் வடிவமைக்கப்பட்ட, ‘பசுமை’ பட்டாசுகளைத் தீபாவளியின் போது குறிப்பிட்ட அளவில் பயன்படுத்திக்கொள்ள இந்திய உயர் நீதிமன்றம் கடந்த வாரம் அனுமதி அளித்திருந்தது.

இருப்பினும், கட்டுப்பாடுகள் தொடர்ந்து மீறப்படுகின்றன; நகரம் முழுவதும் வெடிச்சத்தங்கள் எதிரொலித்துக் கொண்டிருக்கின்றன.

நவம்பர் 9-ஆம் திகதி அதிகாலையில், பட்டாசுகள் பெருமளவில் வெடிக்கப்பட்ட சில மணிநேரங்களுக்குப் பின்னர், மந்திர் மார்க் (Mandir Marg) பகுதியில் புற்றுநோயை உண்டாக்கும் PM 2.5 நுண்துகள்களின் அளவு ஒரு கன மீட்டருக்கு 879 மைக்ரோகிராம்களாக இருந்தது. 

இந்தத் தகவலை, நகர அரசு நிலையத்தின் தரவுகளை மேற்கோள் காட்டி, கண்காணிப்பு அமைப்பான ‘ஐக்யூஏர்’ (IQAir) தெரிவித்துள்ளது.

இது உலக சுகாதார நிறுவனம் (WHO) பரிந்துரைத்த தினசரி அதிகபட்ச அளவை விட சுமார் 59 மடங்கு அதிகம் ஆகும்.

30 மில்லியனுக்கும் அதிகமான மக்கள் வசிக்கும் புது டெல்லியில், புகைமூட்டத்தைக் கட்டுப்படுத்தும் முயற்சியின் ஒரு பகுதியாக, போக்குவரத்து மற்றும் கட்டுமானப் பணிகள் மீது அதிகாரிகள் அண்மைக் வாரங்களில் கட்டுப்பாடுகளை விதித்துள்ளனர்.

இந்திய சுற்றுச்சூழல் அமைச்சகத்தின் தகவல்படி, டெல்லியில் குளிர்கால காற்று மாசுபாட்டில் 23% வாகனங்களால் ஏற்படுகிறது.

விவசாயக் கழிவுகளை எரிப்பது உள்ளிட்ட உயிரிப் பொருள்களை எரிக்கும் செயல்கள் 20% பங்களிக்கின்றன.

நிலக்கரியால் இயங்கும் மின் உற்பத்தி நிலையங்கள் உள்ளிட்ட தொழில்துறை சுமார் 9% பங்களிக்கிறது.

இதில் மிகப்பெரிய பங்கான 27 சதவீதம், இரண்டாம் நிலைத் துகள்களிலிருந்து உருவாகிறது. 

வாகனங்கள், தொழிற்சாலைகள், மின் உற்பத்தி நிலையங்கள் மற்றும் உயிரி எரிபொருள் எரிப்பு ஆகியவற்றிலிருந்து வெளியேறும் வாயுக்கள் வளிமண்டலத்தில் வினைபுரியும்போது இந்தத் துகள்கள் உருவாகின்றன.

‘தி லான்செட் பிளானட்டரி ஹெல்த்’ (The Lancet Planetary Health) எனும் ஆய்விதழில் 2024-ல் வெளியான ஒரு ஆய்வு, 2009 முதல் 2019 வரையிலான காலகட்டத்தில் இந்தியாவில் நிகழ்ந்த 38 லட்சம் (3.8 மில்லியன்) மரணங்களுக்கு காற்று மாசுபாடு காரணமாக இருந்திருக்கலாம் என்று மதிப்பிட்டுள்ளது.