அ.தி.மு.க முன்னாள் சட்டமன்ற உறுப்பினரான வடசென்னை (கிழக்கு) மாவட்டத்தை சேர்ந்த வி.நீலகண்டன் கட்சியின் அடிப்படை உறுப்பினர் பொறுப்பு உட்பட அனைத்து பொறுப்புகளில் இருந்தும் நீக்கப்பட்டுள்ளார்.
அ.தி.மு.க.இணை ஒருங்கிணைப்பாளரும் முதலமைச்சருமான எடப்பாடி பழனிசாமி, ஒருங்கிணைப்பாளரும் துணை முதலமைச்சருமான ஓ.பன்னீர்செல்வம் ஆகியோர் வெளியிட்டுள்ள ஊடக அறிக்கையிலேயே இவ்விடயம் தெரிவிக்கப்பட்டுள்ளது.
குறித்த ஊடக அறிக்கையில் அவர்கள் கூறியுள்ளதாவது, “அ.தி.மு.க.வின் கொள்கை, குறிக்கோள்களுக்கும் கோட்பாடுகளுக்கும் முரணான வகையில் செயல்பட்டதாலும் கட்சியின் கண்ணியத்திற்கு மாசு ஏற்படும் வகையில் நடந்து கொண்டதாலும் கட்சி கட்டுப்பாட்டை மீறி அ.தி.மு.க.விற்கு களங்கமும் அவப்பெயரும் உண்டாகும் விதத்தில் செயல்பட்ட காரணத்தினாலும் சட்டமன்ற உறுப்பினரான வட சென்னை (கிழக்கு) மாவட்டத்தை சேர்ந்த வி.நீலகண்டன் கட்சியின் அடிப்படை உறுப்பினர் பொறுப்பு உட்பட அனைத்து பொறுப்புகளில் இருந்தும் நீக்கி வைக்கப்படுகிறார்.
காஞ்சிபுரம் மாவட்டத்தை சேர்ந்த ஆர்.வி.ரஞ்சித்குமார், முன்னாள் அமைச்சர் எஸ்.சுந்தரராஜ், விருதுநகர் கிழக்கு மாவட்டத்தை சேர்ந்த எம்.ஜி.ஆர். மன்ற நிர்வாகிகள், என்.எஸ்.வாசன், மணிகண்டன், ராமராஜ் பாண்டியன், வேல்முருகன் ஆகியோரும் கட்சியில் இருந்து நீக்கப்படுகிறார்கள். இவர்களுடன் யாரும் எவ்வித தொடர்பும் வைத்துக்கொள்ளக்கூடாது” என அறிக்கையில் அவர்கள் குறிப்பிட்டுள்ளனர்.
