நீதிமன்ற அவமதிப்புக் குற்றச்சாட்டில் சிறைத் தண்டனை அனுபவித்துவரும் ரஞ்சன் ராமநாயக்கவின் நாடாளுமன்ற உறுப்புரிமை வெற்றிடத்திற்கு அஜித் மான்னப்பெரும நியமிக்கப்பட்டுள்ளார்.
தேர்தல்கள் ஆணைக்குழுவின் இந்த அறிவிப்பு இன்று (வியாழக்கிழமை) மாலை வர்த்தமானியில் வெளியிடப்பட்டுள்ளது.
நீதிமன்றத்தை அவமதித்த குற்றச்சாட்டில் ரஞ்சன் ராமநாயக்கவிற்கு நான்கு வருடங்கள் கடூழியச் சிறைத் தண்டனை விதித்து கடந்த ஜனவரி 12ஆம் திகதி நீதிமன்றம தீர்ப்பளித்தது.
இதனையடுத்து, தனது நாடாளுமன்ற ஆசனத்தை இரத்துச் செய்வதைத் தடுக்கும் வகையில் உத்தரவு பிறப்பிக்கக் கோரி ரஞ்சன் ராமநாயக்க சார்பில் மனுத் தாக்கல் செய்யப்பட்டது.
எனினும், குறித்த ரிட் மனுவை கடந்த ஐந்தாம் திகதி மேன்முறையீட்டு நீதிமன்றம் தள்ளுபடி செய்திருந்தது.
இந்நிலையில், கடந்த மூன்று மாதங்களாக நாடாளுமன்ற அமர்வுகளில் ரஞ்சன் ராமநாயக்கவினால் கலந்துகொள்ள முடியாத நிலையில் அவரது நாடாளுமன்ற உறுப்பினர் பதவி இரத்துச் செய்யப்படுவதாக அறிவிக்கப்பட்டதன் பின்னர் அந்த ஆசன வெற்றிடத்திற்காக அஜித் மான்னப்பெரும நியமிக்கப்பட்டுள்ளார் என்பது குறிப்பிடத்தக்கது.
